DELESTAZY LAVARENY

Ankoatra ireo mponin’i Fenoarivo izay efa minia tsy miteny intsony noho ny hafitsoky ny orinasa JIRAMA dia anisan’ny tena mitondra faisana ihany koa ny mponin’Itaosy. Ora efatra isan’andro no hiainan’izy ireo izany raha kely. Amin’ny 2 ora maraina ka hatramin’ny 04 ora maraina eo ho eo ny andiany voalohany isan’andro. Isan-kariva manomboka amin’ny 06 ora na amin’ny 07 ora eo ho eo kosa ny andiany faharoa izay maharitra ora iray sy sasany raha kely. Vao omaly Alatsinainy 29 Jolay ohatra dia naharitra ora 4 teo ho eo ny fitambaran’ny delestazy teny an-toerana izay marihina fa ao anatin’ny fotoana fijerena vaovao amin’ny vata fahitalavitra sy fanaovan-draharaha mihitsy. Eo an-danin’izay ambany be ny herin’ny jiro na ambony loatra rehefa miverina tampoka ka tena manimba zavatra. Tsy misy izay tsy nitaraina ireo mponina vokatr’izany ankoatra ny haizim-pito hamakivakiana ny elakelan-trano hamonjena fodiana ho an’ireo mbola namonjy asa aman-draharaha. Mbola ny fahataran’ny solika mavesatra entin’ny fiara eny an-dalana miazo ny renivohitra sy ny manodidina hatrany moa ny fialana bala hataon’ny orinasa JIRAMA. Eo an-danin’izay anefa dia tsy mitsaha-midangana ny faktioran-jiro aloha isam-bolana.
Pati
Legende : Saika ny fiverenan’ny jiro tampoka amin’ny ankapobeny no manimba ireo kojakojan-dakozia tahaka izao !