Fifidianana Filohan’ny Vaomieran’ny UA

Vaomieran’ny Vondrona Afrikana (CUA) vaovao, handimby an’i Moussa Faki Mahamat, izay nitantana valo taona. Firenena 49 tamin’ny 55 no nandray anjara tamin’ny fifidianana, ka tany amin’ny « Round 1 » dia efa hita taratra ny ho faharesentsika satria Raila Odinga nahazo 20, Ali Youssouf 18, Richard Randriamandranto 10, Firenena iray vato maty. Nihena am-pitoerana ka tamin’ny Round 2 dia Raila Odinga 22, Ali Youssouf 19, Richard Randriamandranto 7. Ny Round 3 Raila Odinga 20N, Ali Youssouf 23, Richard Randriamandranto 5 ka nihintsana teto isika. Ny Round 4, Raila Odinga 21, Ali Youssouf 25, Richard Randriamandranto (2),... Niala an-daharana nialohan’ny « round 6 » i Raila Odinga izay nosokajiana ho « favori » hatrany am-boalohany, ka lany teo amin’ny « round 7 » tamin’ny 33/49 i Mahmoud Ali Youssouf satria tsy maintsy ny 2/3 amin’ny mpifidy no azo izay vao mandresy. Minisitry ny raharaham-bahiny sy ny fiaraha-miasa iraisam-pirenena tao Djibouti nanomboka ny taona 2005 hatramin’izao 2025 izao i Mahmoud Ali Youssouf, izany hoe fa mafy amin’ny resaka diplaomasia, ka nahavita nandresy lahatra ireo mpitondra Afrikanina. Elanelam-panahy eo anatrehan’ny tsy fitoviana aty Afrika, ary ambaran’ny mpandinika fa fanapahan-kevitra manan-tantara ho an’ny kaontinanta ary manamarika kihon-dalana lehibe ho an’i Afrika sy manambara ny fanoloran-tenan’ny Vondrona Afrikanina amin’ny diplaomasia, fiaraha-miasa ary fampandrosoana maharitra ny fiakarany eo. Andaniny, miharihary ankehitriny ho antsika Malagasy, fa tonga tamin’ilay fiteny hoe : «sotroranon’alika ka tsy hetaheta fa sotasota », naleo lo toy izay ho an-kavana ity toerana ity noho ny sotasota polititika sy hambo-po diso toerana. Ny Filoha teo aloha Hery Rajaonarimampianina no nikasa ho kandidan’i Madagasikara, efa naharesy lahatra ireo mpitondra Afrikanina maro, tsy vaovao amin’ny iraka sy fandaminana aty Afrika ary efa nampiandraketin’ny Vondrona Afrikanina iraka goavana toy ny naha Lehiben’ny iraka mpanara-maso ny fifidianana tany RDC,… Tsy nahazo ny fankatoavana hatramin’ny farany tamin’ny Fitondrana Rajoelina, kanefa io mitombina tanteraka io ny filazan’Atoa Rivo Rakotovao volana maro lasa izay hoe : «lalao iraisam-pirenena no atao dia mpilalao divizionina faha-4 no ajoro. Tsy hoe faly amin’ny tsy fahalanian’ny kandidan’ny volomboasary, fa sary maneho sy mampibaribary ihany koa io fa rehefa fifidianana madio sy milamina tahaka ireny dia vizana ny volomboasary satria tsy afaka manao mikimaky na manao tsindry amin’ireo rafitra. Angaha tsy nentina tany ny CENI, HCC, Emmo-reg,… hoy ny vazivazy zary tenany ataon’ny olom-pirenena izay tokony hahatonga saina ny Fitondrana. Mbola any amin’ny fihetsiky ny mpanohitra no mahaseriny ny mpitondra sasany fa tsy fandinihan-tena hoe : nahoana tokoa no tsy lany ?
Toky R