Hankalàza ny 70 taona ny F.I.TE.VA

nataon’ny F.I.TE.VA na Fikambanana ifanampian’ny terak’i Vakinankaratra izay nanao fanambarana iombonana tetsy amin’ny Restaurent Tsiky Ambohijatovo ny sabotsy teo. Faritra be velarana sy be mponina ary isan’ny sompitra ara-tsakafo koa iny faritra iny, hoy ny fanazavàn’ny sekretera jeneraly nasionalin’ny fikambanana, Ranaivoson Patrice. Distrika miisa 7 no mandrafitra azy dia Betafo, Antsirabe I, Antsirabe II, Antanifotsy, Ambatolampy, Faratsiho, Mandoto, hoy izy. Tanjon’ny fikambanana ny fifankatiavana sy firaisankina, fifampitsinjovana, fandraisana anjara amin’ny asa ara-toekarena, ara-piainana, ara-pitadiavana, fiarovana ny zon’olombelona, fikolokoloana sy fanabeazana ny taranaka, fifampitaizana, fifandaminana amin’ny ady tany sy ny fandriampahalemana eo amin’ny fiarahamonina. Ny 19 may 2019 no tontosa tany Toamasina ny kaongresy nitantanan’ny birao nasionaly tao anatin’ny 5 taona, araka ny sata fototra nitondràn’izy ireo. Tapitra ny 19 may 2024 izany fe-potoana izany. Ho fampiharana ny andininy faha 18, 19, 20 ao amin’ny lalàna fototra dia tsy maintsy atao ny kaongresy nasionaly hanavaozana ny mpikambana mandritry ny 5 taona manaraka. Natsangana ny komity hanomana izany kaongresy izany sy ny fankalazàna ny faha 70 taonan’ny fikambanana. Ny 30 may hatramin’ny 1 jona 2025 no ho tanterahina eto Antananarivo ny kaongresy. Manainga ny mpikambana rehetra manerana ny nosy afaka mifidy mba hiomana amin’izany fotoan-dehibe izany. Antsoina ny olona rehetra malala-tanana, tsara sitrapo hifanampy amin’ny fanatanterahana ireo fotoan-dehibe ireo. Mijery ny lafiny rehetra amin’ny fampandrosoana ny faritr’i Vakinankaratra na ara-toekarena na sosialy na fiainam-pianakaviana na fotodrafitrasa samihafa ny F.I.TE.VA. Manana toeram-pitsangatsanganana mahasintona be izany Vakinankaratra izany na ao Betafo na Antsirabe na Ambatolampy. Mila fanatsaràna, noho izany, ny fotodrafitrasa ao Vakinankaratra. Isany ny lalana miditra amin’ireny toera-mahasarika na «site touristique» ireny. Toy izany koa ny fanamboarana ny lalana hamoahana ny vokatra. Vita io ny RN 43 na lalam-pirenena faha 43 fa ny fampandrosoana an’i Vakinankaratra iraimanontolo mihitsy no hanentanana amin’ny alalan’izao F.I.TE.VA izao na ny resaka vokatra mampalaza azy toy ny voankazo sy sakafo maniry ambany tany io na hafa. Betsaka ny asa vita tao anatin’izay 70 taona izay ary misy ny fitenenana hoe tsy azo ihodivirana ny feon’i Vakinankaratra amin’ny lafiny rehetra na ara-politika na toekarena na sosialy ary filamatra nenti-nampandroso ny faritra rehetra ny zava-misy ao amin’ny faritr’i Vakinankaratra. Ahitàna manam-boninahitra Jeneraly, mpandraharaha, mpampianatra, manam-pahaizana ara-toekarena, tanora, izany hoe misandrahaka amin’ny sehatra rehetra, ny komity hanomana ity kaongresy sy fankalazàna ny faha 70 taona ity, hoy hatrany ny fanamarihana sy fanazavana nomen’ny F.I.TE.VA.
J. Mirija