MITIA 12 TAONA NAOLAN’NY MIARAMILA

Mitia no fantatra fa naolana mpitandro ny filaminana tany Ambohitsaratelo Imerintsiatosika herinandro maromaro izay. Raha araka ny fanazavan’i Mitia dia handeha hianatra no nobatain’ilay miaralina ary dia naolany. Rehefa vitan’ity farany izay nataony raha araka ny fanazavan’i Mitia hatrany dia nafarany mafy tsy hiteniteny aman’ olona ilay zaza fa hovonoiny, hono. Rehefa tonga tany am-pianarana efa i Mitia dia nisy ankizy namany nahita azy nitomany. Na izany aza niezaka nanafina ny fanolanana nahazo azy ihany ity zaza tsy manan-tsiny ity. Tsy nijanona teo anefa ny tantara fa niova ny toe-batan’i Mitia ka nentin-dRay aman-dReniny nanatona mpitsabo izy. Nandritra izany no nahafantarana fa bevohoka efa-bolana izy ka teo vao notantarainy ny fanolanana nanjo azy. Niezaka ny nitady vahaolana ireo Ray aman-dReniny taorian’izany. Ny nampalahelo anefa dia nanakatom-baravaravarana tamin’izy ireo avokoa izay rehetra nitarainany raha vantany vao nahare fa mpitandro ny filaminana no nahavanon-doza. Efa voatetin’izy ireo ny teto an-drenivohitra raha ny vaovao azo saingy tsy nisy nahavaha ny olany. Noraisin’ny Solombavambahoaka Rajerison Antoine an-tanana noho izany i Mitia sy ny Reniny. Vaovao farany azo kosa ny fahafantarana fa ny Fitsarana ao Arivonimamo no efa mandray an-tanana ny raharaha. Afenin’ny namany kosa ilay mpitandro ny filaminana izay voalaza fa miaramila zazavao ao amin’ny RAL Imerintsiatosika.
Pati
Legende : Izy mianaka sy ny Depiote Antoine Rajerison !