Rio Tinto QMM

nanolotra ireo tetikasa RSE laharam-pahamehana teo anivon’ny komity mpandinika momba izany, izay notarihin’ny minisitry ny harena an-kibon’ny tany, niaraka tamin’ny minisitra miisa 2 misahana ny jono sy ny tontolo iainana, ireo solontenan’ny minisitera hafa, ary ny governoran’ny faritra Anosy, i Rio Tinto QMM, ny alakamisy 8 aogositra 2024, hoy ny fampitam-baovaon’ny QIT Madagascar minerals ny sabotsy teo. Hatramin'ny nanasoniavana ny fifanarahana vaovao tamin'ny taona 2023, mba hamaliana ny tena filàn'ny fiaraha-monina, hoy ny fanazavana, dia nisy ny hetsika fampahafantarana sy atrikasa notanterahina niaraka tamin'ny fiarahamonina, ny olobe, ary ireo mpiara-miombon'antoka hafa. Niara-niasa tamin'izany i Rio Tinto QMM sy ny faritra Anôsy. Nofantarina tao anatin'izany ireo tetikasa RSE laharam-pahamehana, izay natolotra tamin'ny alakamisy teo. Nanasongadina ireo tetikasa hotanterahina any ifotony io fihaonana io, toy ny famatsiana ny herinaratra eny ambanivohitra, ny fampisitrahana rano fisotro madio, ny fanohanana ny fandraharahana sy ny maro hafa. Hankatoavina amin'ny filankevitry ny minisitra ny lisitr'ireo tetikasa ireo mba hahazoana antoka ny fangaraharana sy ny fampiasana araka ny tokony ho izy ny vola natokana ho amin'izany, araka ny fepetra voarakitra ao anatin'ny fifanarahana vaovao, hoy hatrany ny fampitam-baovao voaray.
J. Mirija