TIM Alakamisy Fenoarivo

Fenoarivo ny hetsika ara-panatanjahantena nosokafana teny an-toerana ny sabotsy lasa teo. Niroso tamin’ny « Tournoi Mendrika » amin’ny anaran’ny Antoko Tiako i Madagasikara, izay andraisan’ny isam-pokontany anjara, ary misy fsolontena avokoa ireo fokontany rehetra mandrafitra ny kaominina ny teny an-toerana, araka ny fanazavanan’Atoa Rasolonirina Mendrika, mpiara-mitarika manetsika sy manentana ireo mpikatroka sy ny tanora ary ny vahoaka eny an-toerana hiara-hientana. Ekipa 16 no mandray anjara, misy sokajy 4, lalao 3 isaky ny vondrona. Ondry sy kojakoja maro samihafa ilaina amin’ny fanatanjahantena no amboara ao anatin’izao fifaninanana izao. Tafiditra ao anatin’ireo hetsika samihafa karakarain’ny Antoko TIM eny an-toerana. Hetsika natao hamondronana sy hitezana ny tanora tsy hidonanam-poana sy tsy hirona amin’ny zava-mahadomelina izy ity, raha ny fanazavan’Atoa Rasolonirina Mendrika hatrany. Hatao matetika io ho an’ny tanora, ary voalohany ho azy ireo, fa mbola hisy ihany koa ny hetsika hafa any amin’ny taona, raha ny fanazavany. Ezahana handeha araka ny tokony ho izy ny fikarakarana ny tanora sy ireo sehatra samihafa eo anivon’ny kaominina Alakamisy Fenoarivo, hoy hatrany ny fanazavana. Somary natoritory ny antoko TIM teo aloha, fa efa tena mifoha tanteraka amin’ny toromasony amin’izao fotoana izao, ka tafiditra ao anatin’izany ny hetsika tahaka izao, hoy hatrany Atoa Rasolonirina Mendrika. Miezaka ho an’ireo sokajy rehetra na vehivavy na ankizy, eny fa na olon-dehibe aza raha azo atao amin’izay lafiny rehetra ara-pampandrosoana azo atao ao amin’ny Faritra Alakamisy Fenoarivo. Tsy ny avy amin’io Antoko io ihany, fa vao nahare azy ity ny vahoaka, dia nirohotra na ny mpandray anjara mivantana na ny mpanohana azy ireo, hoy hatrany ny mpikarakara.
Toky R