Tolotra amin’ny fifandraisan-davitra

Tsy misy izay orinasam-pifandraisana tsy naharenesana fitarainan’ireo mpanjifa. Ireo mpampiasa tambazotran-tserasera sy aterineto moa no tena mikolay. Tolotra mitentina 1000 Ariary kanefa dia tsy misy azo natao tamin’ny hafa tsy nandefa sary anankiray, hoy ny mpanjifa iray. Tolotra efa manafosafo ny 20.000 Ariary kanefa anatin’ny 1 andro dia efa ny antsasany mahery no lany, ho anay mampiasa solosaina, hoy kosa ny mpanjifa hafa manao irony asa ampitain-davitra na «télétravail» irony. Manao izay danin’ny kibony sy hita ho gaboraraka tanteraka, indrindra, tato ho ato ireo tambazotram-pifandraisan-davitra miisa 3 eto Madagasikara, raha ny fitarainan’ireo mpanjifa hatrany. Tsiahivina hatrany fa nilaza ny handray fepetra ho an’ireo orinasam-pifandraisana mbola tsy mamerina amin’ny tena araka ny tokony ho izy ny tolotra omeny moa ny fitondram-panjakana saingy mbola handrasana hatrany anefa i Ambatobevohoka hatramin’izao. Ilay vaomiera natao hisahana ny fanadihadiana momba izany teny anivon’ny antenimieram-pirenena moa very an-javona tanteraka. Tapitra ihany ity ny fotoam-piasan’ireo solombavambahoaka. Asa izay ho tohiny ao anatin’izao fe-potoana vaovao hiditra tsy ho ela izao.
J. Mirija