raha ny Nambaran’ny Minisitry ny serasera sy ny kolontsaina Rtoa Mara Donna omaly. Resaka fanapariahana horonan-tsary mamoafady moa no voatoatin’io raha hiverenana. Navadika ho raharaham-panjakana na « affaire d’Etats » tahaka ilay fanapoizina ara-tsakafo tsy nahy nahazo ny Filoham-pirenena sy ny ekipany ihany koa izany izy ity. Nambaran’ny Minisitry ny kolontsaina sy ny serasera fa zon’ny voakasika tanteraka izany. Manao « saisine » eo anivon’ny mpitandro ny filaminana ihany koa ny Minisitera mikasika iny tranga iny, ary nolazaina fa tsy iny ihany fa tamin’ireo tranga maro. Ao anatin’ny fanadihadiana satria efa nanao taratasy ny Minisitera, hoy ny fanamafisana. Misy ihany koa ny « Brigade anti-piratage » sy ny resaka « Cybercriminalité » eo anivon’io Minisitera, ka raisinay ny andraikitra tandrify anay, hoy ny Minisitra Mara Donna. Nasian’io Minisitra io teny ihany koa ny maha mpanakanto ny lasibatra, fa eo ihany koa ny maha vehivavy azy izay mbola sokajiana ho marefo, fa ny vehivahy ihany koa no maro an’isa ka nahoana no tsy hijoro hijoro ny Minisiteran’ny serasera hiarovana ny marefo sy ny vehivavy izay vao tsy ela no nanamarika ny 8 martsa. Fa maninona no tsy nandray andraikitra tamin’ny tranga hafa ? Tapitra ny fotoanan’ny fanentanana sy fampandraisana andraikitra, fa fotoana izao hampiharana ny lalàna. Mangataka fiaraha-miasa amin’ny tompon’andraikitra ara-panjakana, ny Fitsarana, mba hampihatra lalàna amin’ireo rehetra mandika lalàna amin’ny tambajotran-tserasera satria lasa hanimbana fiainan’olona. Na ny Filoham-pirenena sy ireo lehibena andrim-panjakana aza misy manimbazimba sy manompa fa nandefitra satria Raiamandreny, kanefa tonga ny fotoana hampiharana ny lalàna tsy misy ankavanaka, hoy io Minisitra io nilaza fa tompon’andraikitra amin’izay zavatra avoakany ny tsirairay. Niantso ny fampiasana ny tambajotran-tserasera mba ho amin’ny mahasoa moa io Minisitra io.
NA IZANY AZA…
Tsy vao sambany tamin’ireo tranga miendrika famotehana olona ny nahazo ity mpanakanto ity, fa efa nisy ireo lasibatra tahaka ireny teo aloha, saingy toa tsy naharototra fa vitavita ho azy teny. Efa nisy ny mpanakanto lasibatra tamin’ny lafin-javatra hafa ary nandohalika tamin’ny Fanjakana hatramin’ny namany aza mba hamoahana azy fa tsy nisy nihaino, tsy namelana raha tsy maty tany am-ponja dia tsy iza fa i Ninie Donia, fa tsy nisy Minisitera na olom-panjakana nanome lanja izany noho ny hevitra tsy mitovy,… Maro ny fanamelohana izay iombonana hevitra amin’izy ireo satria fandikan-dalàna ireny. Tsy mahasakana ny fanehoan-kevitra samihafa ihany koa anefa hoe: tsy misy atao ny Fanjakana ka miditra amin’ny tsy tokony hidirana, raharaha sivily avadika « affaire d’Etats »,… Ao ny milaza fa andraikitra iraisan’ireo voakasika ireny ary raha ny fehezan-dalàna famaizana dia samy meloka. Ao ny maneho fa raha olona tsy malaza ireny dia nolazaina fa zaza maditra sy ratsy taiza,… tsy nahataitra ny mpitondra ! Zava-dehibe aloha ny nilazan’ny Minisitera hoe : handray andraikitra manoloana ny zavatra rehetra ka dia andrasana izany ny tohiny e !
Toky R
TENA MIHATRA AMIN’NY REHETRA VE NY LALANA ?
Nampanantena ny Minisiteran’ny serasera sy ny kolontsaina, fa handray fepetra amin’izay manoloana ny fandikan-dalàna sy heloka amin’ny tambajotran-tserasera. Andrasana izany ilay hoe : fampiharan-dalàna ho an’ny rehetra satria ny sary nitranga hatramin’izay dia ireo manohintohina ny fitondrana ihany no hitan’ny mason’ny haraton’ny mpitondra amin’ny resaka fandikan-dalàna, fa ny ankoatra izay tratry ny baolina ankamely, malalaka ny fanalam-baraka sy fanosoram-potaka. Tany amin’ny fiandohan’izao fitondrana izao, nihazakazahana ny nisambotra sy nanagadra an-dry Be-Rija Ravelomanantsoa rehefa naneho hevitra teny amin’ny tambajotran-tserasera tany amin’ny fiandohan’ny valanaretina coronavirus. Nihazakazaka ny fisamborana sy fanagadrana an’i Stan’ley Ramarivelo tany amin’ny oktobra 2022 rehefa notondroina ho ao ambadiky ny kaonty nolazaina fa mpaniratsira fitondrana. Haingana dia haingana ny fisamborana sy fanagadrana an’i Jean-Luce Randriamihoatra rehefa nolazaina fa niditra tamin’ny tranonkalan’ny CENI,… Zava-dehibe ny fandraisana andraikitra fa moa tena mitovy tantana ve ny rehetra ? Tranga azo ampahatsiahivina ny fisandohana ny sonia anaran’ny Filoha teo aloha Marc Ravalomanana natovana tamina taratasy tsy misy ifandraisana nentina nandotoana azy 4 na 5 taona lasa teo, izay nisy fitoriana fa tsy nisy tohiny. Tahaka izany ihany koa ny fitoriana nataon’i Tahina Razafinjoelina mikasika fanalam-baraka, fanosoram-potaka, fanamboarana horonan-tsary sy horonam-peo na « montage vidéo » natambatambatra nentina nampiadiana namotehana ara-politika vao tamin’ireo raharaham-pifidianana vao vita faramparany teo fa tsy nisy tohiny. Tahaka izany ihany koa ny fanitsakitsahana sy fametavetana tanteraka ny soatoavina Malagasy nilazana mpikambana iray tao anatin’ny Antoko HVM efa nodimandry kanefa mbola nalam-baraka ho mikononkonona fanonganam-panjakana,… Ampahany ireny fa moa mba nisy tompon’andraikitra ara-panjakana niloa-bava sy nanao fampahatsiahivana sy fampitandremana na « rappel à l’ordre » ve nanoloana an’ireny ?
Toky R
