.jpeg)
Tovovavy kely vao 12 taona i Ravo, monina manodidina an’Andranomandroatra na Geyser ao anatin’ny kaominina Alatsinainikely, lalam-pirenena voalohany. Teo amin’ny faha-11 taonany izy no efa nanita-tsaina nitady vola noho ny hasarotan’ny fiainana ka anisan’ny sehatr’asa hitany ny fanaovana kisary kely amin’ny tarehy na face painting amin’ny alalan’ny tany malandy ho an’ireo vahiny tonga mitsidika ity toerana ity. Tahaka izao ny resaka nifanaovany tamin’ny gazety Tia Tanindrazana.
Ohatrinona isan’andro ny vola azonao ety dia hanaovana inona izany ?
Amin’ny andavanandro tsy dia be olona ety amin’ny Geyser. Indraindray mahazo 3.000 Ar eo raha mahatratra 10.000 Ar no mihoatra izany rehefa faran’ny herinandro. Amin’iny mantsy no tena be olona. 1.500 Ar no manao kisary voninkazo kely tsotsotra amin’ny tarehy ho an’ny olona iray. Hangoniko handoavako saram-pianarana isam-bolana ny vola azoko amin’ilay izy.
Firy iraitampo ry Ravo dia iza no nampianatra anao ireny kisarisary kely ireny ?
Dimy mirahavavy izahay dia zokiko ny roa. Zandriko kosa ny roa. Sahirankirana izahay amin’ny fiainana dia tsy maintsy mifanampy amin’ireo Ray aman-dReny. Ny namako no nampianatra ahy ireny kisary kely hatao amin’ny tarehy ireny. Dia rehefa amin’ny hariva avy mianatra aho mianatra mamorona koa. Efa manana sary kely miisa 6 aho izao.
Kilasy fahafiry zao Ravo dia mikasa hanao inona rehefa lehibe ?
Kilasy fahaenina aho izao. Any amin’ny sekoly tsy miankina aho no mianatra dia ny droit-ko no alohan’ireo Ray aman-dReniko fa ny saram-pianarako isam-bolana kosa izaho ihany no miantoka azy. Mba te-ho lasa mpanamboatra tarehy matihanina mantsy aho rehefa lehibe. Dia te-hanao dokotera kosa aho. Tsy manimba tarehy ve ireny tany malandy ireny ? Tsy manimba tarehy izy kah. Mitondra vitamina ho an’ny vatana aza. Betsaka ireo mitondra ny tany malandy miloko mavo hahasotra amin’ny tarehy rehefa tonga any amin’ny misy azy. Izay no mahatonga ireo olona marobe avy any Antananarivo miotra aty aminay koa rehefa faran’ny herinandro. Tany malandy ihany koa no hampiasaina. Maharitra enim-bolana ny faharetan’ny fiasany amin’ny vatana sady mahasalamana.
Ahoana ny hataonao rehefa amin’ny andavanandro amin’ilay sady mitady vola no mianatra ?
Rehefa tsy mianatra hariva na mirava aloha aho no mihazakazaka mankeny amin’ny Geyser. Indraindray koa miditra amin’ny 10 ora mirava amin’ny 12 ora dia mandeha mitady vola kely aloha sitrany ahay. Rehefa Sabotsy sy Alahady alina indray aho no manao devoara sy mamerin-desona amin’ilay mbola mitady vola ny atoandro.
Pati
Legende : Samy miezaka mampandeha ny fiainany ny isam-batan’olona amin’izao noho ny hasarotan’ny fiainana !
