Edito Tafahoatra!

hatramin’ny taona 2019 izay. Asa moa izany aminy hoe rahoviana no tokony hanome tsiny? Iza na iza avy ihany koa no tokony omena tsiny raha izao iaraha-miaina izao ankehitriny ny zava-misy eto amin’ity firenena ity? Vary efa lo, efa norarahana solika satria hodorana, no hita tamin’ny sary niparitaka omaly hoe indreo fa mbola misy malagasy maro mitangorona handeha hitsimpona an’ilay izy. Mangotingotika daholo moa ny fon’izay nahita izany sary izany. Asa kosa hoe manao ahoana no mba any an-dohan’ireo mpitondra izao firenena izao rehefa mahita sary tena hoe maizina tahaka ireny? Mitombo indray izany ny endrika isehoan’ny malagasy atao hoe mitsinjoka sy mihinam-pako satria izany izy efa hoe vary lo sy saika hodorana, efa maimbo solika kanefa dia mbola nokafirian’ireo malagasy iray tanindrazana amin’ny tena ihany. Marary ny miheritreritra an’izany ho an’ny olona tena mbola malagasy tokoa. Ny mpitsinjoka zaoridira hatramin’ny repoblika faharoa efa teo ary voalaza fa nitombo aza. Toy izany koa ireo mpatory an-dalana sy rehefa malagasy voalaza fadiranovana eto amin’ity firenena ity. Mirongatra ny tsy fandriampahalemana amin’ny endriny samihafa. Mifamono ho faty mihitsy sy sasany amin’ireo mpiray tanàna, eny, iray tokantrano, raha tsy hilaza afa-tsy ny tranga vao hita omaly tao Ambovombe sy Ambohimangakely fotsiny. Efa hita miharihary izao fa kianja tototry ny bozaka ringidringitra sy voalaza fa feno fenitra maro tsy voahaja. Kianja navaozina nandaniana 77 tapitrisa Euro nefa hatramin’izao mbola tsy nahazo fankatoavana iraisampirenena ihany. Ny an’olona nefa nandaniana 80 tapitrisa Euro ary kianja vao namboarina fa mamiratra ery. Inona izany izao no tokony hidiran’ny fampitahana ny kianjaben’i Mahamasina fahiny sy io kianja io ihany saingy navaozina ary mbola tsy manara-penitra ankehitriny? Mbola tokony ho arovana ihany ve ny fandaniana volam-bahoaka amin’ny endriny maro eto amin’ity firenena ity nefa tsy zarizary toy izany hatrany no vokany? Eo io resaka kianja io, ny resaka lalana, ny manara-pofona lazaina fa manara-penitra isan-karazany sy ny maro hafa tsy voatanisa. Lava dia lava ny lisitra ary tsy ho atonona ny pejy raha tohizana saingy izay angamba no mahafehy azy. Tafahoatra!
J. Mirija