Hoentina amin’ny basy sy ra mandriaka foana ?

hoy ny Raiamandreny am-panahy iray eo anivon’ny FFKM izay. Mba tonga saina sy mandray lesona ny amin’izany ve ny Fitondrana ankehitriny sa mbola mieritreritra fa hahavita hiaro azy mandrakizay ny fahefana sy ny vola ary ny basy aman-tafondro ? Moa ve sanatrian’ny vava ra mandriaka no niakarana teo ka mbola ho tahaka izany vao hiala eo ? Toa maneno sahona avokoa ny zava-misy eto, sarintsarim-pitoniana, sarintsarim-pahamarinan-toerana ara-politika, sarintsarina fandrosoana sy haingo ambony tsikoko no ampiainana ny vahoaka Malagasy fa izay tena fijerena ny marary azy tsy misy, izay tena hanalana ny fahantrana mangeja azy tsy hita soritra,… Zara aza ny vahoaka mahantra fadiranovana sy malemy tsy ho afaka mihetsika mba hahafahana manjakazaka eto amin’ny Firenena. Tsy adala ny olona, ary izany fitiavana sy fanohanam-bahoaka na « adhésion populaire » izany tsy vidiana sy sandaina amin’ny kizarazara na vola kely tsy mankaiza izay fanampiana fitserana avy amin’ny vahiny aza no atao fitaovana. Fitantanana Firenena izany ihany koa tsy vitan’ny tian-kano tsy tian-kano ka asa raha mba tonga saina eo anatrehan’ny hetsika samihafa ataon’ny vahoaka etsy sy eroa ? Raha somary mangingina ny fanoherana politika, dia miha mitombo ireo hetsi-bahoaka toy ny fiarovana ny taniny any amin’ireo tetikasam-panjakana samihafa. Asa misy sy mitoetra tokoa ve ilay fahaiza-mitarika nodradradradraina fa sangany aty Afrika eo anatrehan’ny tsy fahavitana mandresy lahatra sy mandamina ny saim-bahoaka ? Tsy dia atao mahagaga loatra anefa satria tsy zava-baovao ny amboletra sy ny herisetra. Ny nolazaina fa jadona fahiny no hampitomboina avo folo na zato, ka zary lasa tonga amin’ilay hoe : rehefa ny hafa dia vorondolo fa rehefa izy ireo dia voromanga ! Tena izao ve ilay fanovana sy fiovana nodradradradraina hatrizay ? Tsy mba hanaiky ny tsy fahombiazana mihitsy ve fa mbola ny basy aman-tafondro na sanatria ra mandriaka hatrany no hamahana olana ?
Toky R