Iza izany sisa no mba hamaha ireo olana?

samy miaiky amin’izao fotoana izao, na iza na iza mbola miaina eto amin’ity Madagasikara ity, fa tsy milamina eto. Maro ny olana mitranga. Manjaka hatramin’ny lafiny politika ny tsy fandriampahalemana ary tsy hafa fa ireo samy mpiaradia amin’ny fitondràna ihany no matetika saika ahenoana disadisa ary ireny farany teo nifarana tamin’ny fifandatsahana aina toy ny tany Tanambao Tsirandrany ireny mihitsy moa. Na mbola hamerina hilaza aza ny filohana andrim-panjakàna sasany fa tsy mahantra ny malagasy satria mahita ny fitohanan’ny fifamoivoizana na fiantsenan’ny olona maro anaty tsena lehibe toy izay miseho matetika eto Antananarivo sy renivohi-paritany hafa dia ampahatsiahivina ihany koa fa tsy Antananarivo na ireo renivohi-paritany hafa irery akory no atao hoe Madagasikara fa Madagasikara koa ireny ambany ravinkazo tena anjakàn’ny tsy fandriampahalemana ireny. Inona moa no mahatonga ny tsy fandriampahalemana? Inona no mahatonga ny olona hangalatra na hanohy izany amin’ny famonoana olona mihitsy? Fahantrana no fototra sy anton’izany voalohany. Heverina fa fahamarinana efa hatramin’ny fahagola izany. Fahamarinana toy ilay nambarana depiote iray izay hoe izany tsy fandriampahalemana izany koa efa nisy hatramin’ny fahagola. Na lazaina fa afangaro politika io tsy fandriampahalemana io na tsia dia sarotra, indrindra, ho an’ny mpanara-baovao ny tsy hilaza hoe mirongatra izany izao eto satria dia io hita ho matoam-baovao isan’andro io ny fitetezam-paritra ataona trangana tsy fandriampahalemana mampivarahontsana sy mampametra-panontaniana mihitsy hoe mbola fanahina olombelona ve no mahavita azy ireny? Antananarivo, Toamasina, Mahajanga, Bekily na aiza na aiza dia samy andrenesana izany tranga izany avokoa. Maro amin’ireo ray aman-dreny no manafatrafatra ireo zanany hatreny amin’ny tambazotran-tserasera eny hoe aoka mba tsy hody hariva be! Eny fa na ny samy tanora, izay mbola tokony ao anatin’ilay taonan’ny ambara matetika hoe «tokony hanala azy» aza dia mifanafatrafatra amin’izany ihany koa. Ny fanontaniana lehibe mipetraka koa nefa etsy ankilany dia hoe iza izany sisa no mba hamaha ireo olana? Iza? Na ireo heverina sy mitonona ho mpanohitra ary lehiben’izy ireo aza moa ireny mandàny ny atolotra rehetra azy ireo eny amin’ny rafitra isoloany tena avy ireny avy ihany nefa mba misy sasany maro an’asa ihany ao anatin’ilay rafitra.
J. Mirija