Lany henatra !

Miha sahirana andro aman’alina ny Malagasy, kanefa mihamitombo isan’andro ihany koa ny amboletra sy ny tsy fahaiza-mitantan’ny mpitondra. Ny zava-doza, mbola fanadiovan-tena sy fiarovan-tena an-jambany ary fampitenenana ireo mpiara-migoka tombotsoa na fampiasana ireo rafitra samihafa hanamafisan-tseza no atao fa tsy fanintsiana ny dia sy fijerena izay tena soa ho an’ny Firenena. Taorian’ny filazana fa hampindram-bola an’i Kaomoro 6 taona lasa, dia ry Mali sy Soudan indray no zary lasa raisina ho ohatra na « référence » ka mbola mandroso noho ireny hono isika. Ary raha mba maka tsy lavitra sy manao fanoharana amin’ireo nosy manodidina toa an’i Seychelles sy Maurice izay efa lasa lavitra be ara-toekerana, misitraka herinaratra 100%,… Dia mby aiza i Madagasikara ? Izany ve no atao hoe : fitantanana mahomby ? Izany ve no mpitondra mendrika indrindra aty Afrika ? Tsy mba menatra ve sa lany henatra tanteraka e? Mandeha amin’ny kisendrasendra sy ny kianjoanjo eny, tsy misy sori-dàlana mazava hitondrana ny firenena sy hiatrehana ny olana, fa arakaraka ny zava-misy sy mitranga. Dia io iaraha-mahita io ny fomba fiasa toy ny resaka fampidinana vidim-bary. Ny tolotra sy ny tinady no mifehy ny tsena, saingy mivadika velirano ny hampidina 750Ar ny kapoaka amin’ny alalan’ny vary hafarana izay mety hisy fanentsenam-bidin’ny Fanjakana. Tao anatin’ny firy taona nitantanana Firenena ve dia tsy nahita vahaolana tena marin-toerana ? Dia tsy fantatra ve fa isan-taona misy foana ny maitso ahitra ? Mbola ny kirendrarendra sy haingo ambony tsikoko aza no hihazakazahana.
Toky R