Politika mirefarefa !

na hosoram-potoka amin’ny fomba rehetra ? Miha mivaona hatrany ny fanaovana politika eto, misy ny lasa diso adversera, ka raha ny fitantanana tsy mahomby, ny fampahantrana vahoaka mivantana na ankolaka, ny fahantrana amin’ny endriny maro,… no tokony ho fahavalo iraisana, dia ny mpifaninana ara-politika amin’ny fifidianana no lasa fahavalo voalohany ! Moa tsy izany ve no tokony hotoherina ? Tao anatin’ny 15 taona, niaraha-nahita sy niarahana niaina teto ny tsy fahombiazana rehefa nisy ny fanonganam-panjakana sy ny fakana fahefana tamin’ny tsy rariny. Nanjakazaka ny mpitondra naka fahefana tamin’ny tsy rariny, tsy nisy arofanina fa niharatsy ny fomba fitantanana, niha potika tamin’ny lafiny rehetra ny firenena. Moa tena nahomby ve ny fanoherana tao anatin’izany ? Moa tena fanoherana araka ny tokony ho izy sa nisy ihany sarin’ady politika samihafa ? Dia rehefa misy fijery hafa mipoitra, rehefa misy endri-panoherana hafa mitsangana,… ve dia haratsiana sy soketaina ho tsy tena mpanohitra ? Sao mba diso fahavalo e ! Tsy mpifahavalo ny mpilatsaka hofidiana fa mpifaninana, ka tokony hakarina ny lentan’ny adihevitra fa tsy atao mifototra amin’ny fomba fiady mirefarefa amin’ny tany. Tsy aleo ve samy miasa sy tena manasoa vahoaka, fa tsy milalao ny sainy amin’ny politika mirefarefa e ?
Toky R