.jpeg)
Nametra-pialana faobe ny komity mpikarakara ny fifidianana noho ny fahatsapana fa misy tsindry hanerena azy ireo hanaiky ny zavatra tsy mety. Misy iray amin'ireo kandida 3 hifaninana ho filohan'ny oniversite, manana oniversite tsy miankina. Tsy mety izany satria voararan'ny fitsipika mifehy ny fifidianana, hoy ry zareo avy ao amin'ity komitin'ny fifidianana nametra-pialana ity. Raha raisina ohatra hoe nahazo fitaovana na vola fanampiana avy any ivelany ny oniversiten'Antananarivo, dia ahoana no ahazoana antoka fa tsy hisy ho lasa any amin'ilay oniversite tsy miankina izay fananan'ilay filohan'ny oniversite io hoy ny ahiahy. Tsy filam-banona fa tena resaka fanajana ny etika izany indrindra amina toerana ambony saropady toa ny filohana oniversite izany, hoy ny resak avy amina loharanom-baovao iray mahalala tsara ny raharaha sy ny fiainan'ny oniversite. Noho io fametram-pialan'ny komitin'ny fifidianana io dia tsy voahaja ny tetiandro satria tsy raikitra tamin'ny alakamisy 27 febroary teo ny fanombohan'ny propagandy. Mitady hanao amboletra ilay kandidia tsy mahafeno fepetra (resaka conflit d'intérêt) hoy ry zareo avy ao amin'ny komitim-pifidianana. Ny mampiahiahy manaraka dia nilatsaka ny didy avy any amin'ny minisiteran'ny fampianarana ambony milaza ny fametrahana komity manokana na comité ad'hoc hikarakara ny zotram-pifidianana . Mipetraka ny fanontaniana hoe hampanaja ny lalàna velona ve sa hanery ny hanatanterahana ihany ilay fifidianana na dia misy aza ny kandida tsy mahafeno fepetra. Andrasana izay mety ho tohiny.
RTT
