Fandriampahalemana

Nisy nitifitra mantsy ny fiara nitondra ity mpanakanto iray ity sy ny zanany lahy. Tany amin’ny lalam-pirenena faharoa, nivoaka kelin’i Moramanga no nisehoan’izany raha nikasa hiazo an’Antananarivo izy omaly Alatsinainy 26 Jona maraimbe tokony tamin'ny 2 ora sy sasany. Araky ny loharanom-baovao azo dia avy namonjy ilay Festival Zaitra tany Ambatondrazaka izy sy ny mpiray tarika no izao nisy saika hanafika izao ka teo amin'ny fitaratra nifanandrify tamin’i Jaojoby mihitsy no nisian’izany saingy somary nandeha mafy izy ireo ka avotra soa amantsara ihany. Na izany aza tsy nisy ny naratra sy ny aina nafoy tamin'izao fitifirana tampoka izao, fa ny fiara no nisy fahasimbany. Vaky vokatr’izany ny fitaratra aoriana sy ny fitaratra nifanandrify tamin'ny toerana nipetrahan’ity mpanakanto ity. Mampieritreritra ity toe-draharaha iray ity ary mampametra-panontaniana hoe : inona no mety ho antony ? Iza no mahita tombotsoa amin’ny fahafatesan’i Jaojoby ? sa ve karazana don-tandroka izy ity noho ny antony ara-politika sanatria. Hita ho efa voakajikajjy tsara mantsy na ilay toerana akaikin’ny tetezan’i Mangoro na ilay ora ( tamin’ny 2 ora maraina), izany hoe amina toerana mangiana, takotakona ary amin’ny ora efa tena tsy misy mpivezivezy mihitsy ny lalana. Tsara ho marihina fa farany teo dia nanakiana mafy ny fifidianana ny filohan’ny filankevim-pitantanan’ny OMDA i Jaojoby. Andrasana izay ho tohin’ny fanadihadiana.
Pati