Loham- behivavy iray no hitan'ny olona teny amin'ny fanariam- pako teny Morondava Antehiroka ny tolakandron’ny omaly 17 janoary 2024. Efa noraisin’ny manam-pahefana an-tànana ny momba ity tranga hafahafa ity, ka raha ny tomban'ny dokotera dia afak’omaly no nahafaty io olona io. Heverina fa mety ho lohan'ilay ramatoa hita faty teny Mangarivotra Faravohitra hita tamin’ny toerana mangingina ny marain’ny talata lasa teo. Ity farany izay nifatotra ny tongony, nofonosina tao anaty spaonjy sy gony, avy eo nareiana. Tena vono olona feno habibiana, fahasahiana tsy roa aman-tany. Tsikaritra ho miha mahery vaika sy tena anatin’ny habibiana sy amin’ny fomba tsy mifaditrovana ny endriky ny tsy fandriampahalemana amin’izao fotoana izao. Eo ny mety lonilonim-piarahamonina, fa ankehitriny dia tena vola an’aliny na an’hetsiny dia hahavitan’ny olon-dratsy mandatsaka ain’olona amin’ny fomba mahatsiravina, izay endriky ny fahasimban’ny fiarahamonina, fahasimban’ny soatoavina, taratry ny fahantrana sy toa efa maneho an-kolaka an’ilay hoe : mifampihinana ny olombelona ?
Toky R
