Fandriampahalemana

Ambohimangakely. Mitentina 12 tapitrisa Ariary ny vola sy ny tomban'entana very, raha ny fampitam-baovao voaray. Tonga ny alin'io ihany ny mpitandro filaminana ary nandray an-tanana andro aman'alina ny fanadihadiana ny zandary Ambohimangakely. Tonga avy niasa ilay raim-pianakaviana mpanofa trano ao ambadika, sahabo ho tamin'ny 11 ora sy 40 minitra alina, no nahatsikaritra entana iray teo an-tokontany sy nahita lehilahy tao anaty fefy. Vetivety teo anefa nisy 5 lahy hafa nifandrombaka nanampy ity farany ka nidaroka totohondry sy bolabolankazo na “bois rond” ilay mpiasa tafody alina. Nandritra izany koa no nisy nanindrona antsy ny tendany. Niantso vonjy ilay lasibatra ka vory ny fokonolona ary 15 minitra mahery taorian'izay no tonga ny mpitandro filaminana. Tafaporitsaka ireo jiolahy. Notsofain'ireo jiolahy ny vy mitana ny fanalahidin'ilay varavarana vy. Heverina fa efa ora maro no nandroban'izy ireo fa very tao avokoa ny vola, kojakoja an-dakozia sy an-tokantrano lafo vidy ary ny entam-barotra ombana fitaovam-pivarotana tahaka ny mizana. Sady tsena io toerana io. Nanao sesilany ny halabotry, vaky tsena tamin'iny faritra Antanetilava, ampitan'Ikianja iny tato ato. Tsy nisy natory tao amin'io trano voaroba io tamin'io alina io noho ny fandaminana tamina tsena hafa an-drenivohitra fa raha tsy izany dia ahiana ny vono olona. Tsikaritry ny manodidina, ora maro taty aoriana, fa mbola nanentoento ilay entona fampatoriana nanadontoan'ny olon-dratsy ireo mpifanila vody rindrina, hoy hatrany ny fampitam-baovao voaray omaly.
J. Mirija