Zanaka am-pielezan’ny

distrikan’Analalava, faritra Sofia, hoy ny solontenan’ny zanaka am-pielezana any an-toerana, ny Pasitera Andriamilizafy Eli-Seth. Manjaka ny tontakely amin’ny alalan’ny antsoina hoe Apondra, izay mitovitovy amin’ny Foroche fahiny. Tovolahy tsy misaraka amin’ny antsy lava misy zarany, tsy mba mihety volo, mpifoka rongony ka sady mangalatra no manimba ny fambolena ireo. Ny 15 novambra 2024 lasa teo ny ben’ny tanàna teo aloha, Moustapha, izay nitondra hatramin’ny taona 2009 ka hatramin’ny farany teo, dia voarohirohy tamin’ny fisolokiana volan’olona mitentina 30 tapitrisa Ariary. Ireo namany moa dia voatana any am-ponja fa izy sy ireo vehivavy miisa 2 dia arahin’ny fitsaràna maso ka tsy mahazo mivoakan’ny distrikan’Analalava, Antsohihy ary Bealalana mandritry ny 6 volana. Raha ny fiheveranay azy dia noho ny maha kandidàm-panjakàna azy izao. Nozonon’ity ben’ny tanàna ity izay tsy mifidy azy tamin’ny fanombohan’ny fampielezankevitra tamin’ny alalan’ny fanakaramàna ireo mpanazary avy amin’ny doanin’i Nosilava ary nitetezany fokontany mihitsy niteny hoe «Izay tsy mifidy an’i Moustapha kileza botia, tsy mety manjary amin’ny tany hipetrahany, jofo voa rano mizetry alina, mizetry matsagna, volombodin’akanga ka tsy mba afaka hiakatra…». Nanaitra anay zanaka am-pielezana sy vato nasondrotry ny tany avy ao Antsohihy sy Antananarivo izany. Soa ihany izahay fa nomen’Andriamanitra fahefana hanala ozona ka izany no nataonay tao Ambaliha, renivohitry ny kaominina, sy tao Antranobe, Ambodidimaka, Antananambo ny alarobia sy alakamisy 4 sy 5 desambra 2024 lasa teo. Manantena ny raharaham-pitsaràna ao Antsohihy izahay hampihatra ny lalàna momba an’i Moustapha fa manaitra ny minisiteran’ny fitsinjaràm-pahefana sy ny Bianco hijery ny fitantanana tao amin’ny kaominin’Ambanivohitr’Ambaliha nandritr’izay 15 taona izay, izany hoe nanomboka ny taona 2009 hatramin’ny 2024 izahay, hoy hatrany ny zanaka am-pielezana ao an-toerana nanao antsoavo.
J. Mirija