ny famatsiam-bola fanatanterahana ny lalambe migodana mampitohy an'Anjozorobe sy Toamasina, araka ny tatitry ny Fanjakana. 24% ny firosoan’ny asa amin’izao, ary tanjona hamitana tanteraka ny 80km hatramin’ny faran’ity 2025 ity. Nambara fa io tapany voalohany mirefy 80km io dia ny fampiasam-bolan'ny fanjakana malagasy no hiantoka ny fanatanterahana azy ary miroso ny asa ankehitriny. Raha tsiahivina, efa tany amin’ny jona 2022 no nilazan’ny Fanjakana fa 301 miliara Ar no haompana amin’ilay tapany voalohany nolazaina tamin’izany fa ho vita hatramin’ny faran’ny taona 2023. Lany ve ny vola tamin’izany kanefa tsy nisy asa sa nihemotra sy nikisaka nivadika tao anatin’ny tetibolam-panjakana 2024 na 2025 ny vola ? Ny tapany faharoa izay mirefy 80km ihany koa dia efa nahazoana famatsiam-bola avy amin'ny BADEA ary hanomboka ny taona 2026 fara-fahatarany izany. Efa nisy kosa ny fifampiresahana nataon'ny minisitera tamin'ireo mpamatsy vola sy ireo mpiara-miombonʼantoka hamatsiana ny tapany fahatelo amin'ny lalambe migodana izay mirefy 140km. Anisan'izany ny Abu Dhabi Found for Development na ADFD izay naneho ny fahavononany hanohana an'i Madagasikara hanatanteraka izany fotodrafitrasa izany, hoy ny Fanjakana. Nankatoavin'ny Filan-kevitry ny Minisitra ny irosoana amin'ny fifampiraharahana sy fanaovan-tsonia fifanaraham-piaraha-miasa eo amin'ny ADFD sy ny Fanjakana malagasy. Nanao fanamarihana manokana ny Filohan'ny Repoblika ny anarahana akaiky ny tetiandro hanatanterahana ireo asa ireo. Raha ny fampahafantarana tany amin’ny desambra 2022, eo amin’ny 924 tapitrisa dolara ny nambara fa tetibola hanaovana ity làlambe migodana ity, ka ilay tapany voalohany 20% vatsian’ny Fanjakana manome 75 tapitrisa dolara eo ho eo. Noresahana tamin’izany fa vonona hitondra famatsiam-bola 200 tapitrisa dolara eo ny sinoa tamin’ny alalan’ny AfreximBank saingy tsy hita izay niafarany. 849 tapitrisa dolara na 4000 miliara Ar eo izany ny famatsiam-bola hanaovana ny tapany 260 km, izay ny ampahany 80km faharoa no lazaina fa hovatsian’ny BADEA. Tany aloha nolazaina fa vonona ny sinoa, aty aoriana dia ny arabo indray no voalaza fa hamatsy ny tohiny ka dia asa indray izay ho tohiny ? Ny Fly Over izay efa nanaovana serasera hatrany amin’ny 2019 fa hovatsian’ny BADEA vola 20 tapitrisa dolara aza efa nanaovana tsangan-tànana fankatoavana teny amin’ny Antenimiera fa nankaiza ? Vao tamin’ny fiandohan’ny taona indray no nilazana fa 250 hatramin’ny 350 tapitrisa dolara eo no hamatsian’ny BADEA ka 20 tapitrisa dolara ho an’ny Fly Over aza tsy hita ka mainka fa ity tetibola amin’ny làlambe migodana ity ? Tena matotra sa resaka ambony latabatra ? Efa fanao rahateo io serasera mitsimbadimbadika mikasika tetikasam-panjakana ilazana fa matoky ny mpamatsy vola io toy ny Tanamasoandro izay nolazaina fa ny Arabo amin’ny alalan’ny Al-Jabber no hanao azy, niova avy eo fa vonona ny Tiorka,… dia mandrak’ity ny androany samy tsy hita popoka ireo !
Toky R
