kolontsaina

64 taona aho izao, hoy izy, no nilona tanaty mozika fa tsy mitovy tamin’ny niatombohanay mihitsy. Na ny fandraisam-peo na famoahana feo na famoahana ny kanto, nisy fivoarana be. Efa be ny zavatra hitako. Tsy nanomana aho fa tena hitantara an-kira ny lalana nodiaviko tao anatin’izay 90 taona niainana sy 64 taona nihirana izay. Manahirana ihany anefa izany satria tena tantara lava be ka dia nindramiko ireo namana mpanakanto hafa hiaraka hitantara amiko izany amin’ny alalan’ny fameloman-drizareo amin’ny fombany avy ny hiran’I Henri Ratsimbazafy ihany koa, hoy hatrany ity oloben’ny hira sy mozika malagasy ity. Fotoam-pivavahana lehibe nentina nisaorana sy niderana an’Andriamanitra tao amin’ny FJKM Ankadifotsy moa no efa nanombohana sahady ny fanamarihana ny faha 90 taonan’i Dear Henri omaly. Ankoatra ireo fianakaviany dia marobe ireo namana sy tapaka tonga nanotrona azy. Toraka izany koa ireo mpanao politika fanta-daza eto amintsika, mpitandrina…Ankoatra ny maha-mpihira tsotra an’i Henri Ratsimbazafy dia mpamoron-kiram-piderana ihany koa izy izany hoe : mitory ny tenin’Andriamanitra ary manana hira manodidina ny 50 isa eo mifandraika amin’izany sy hira protestanta.
J. Mirija sy Pati