15 taona mahery nahazoana fitondrana

Izy no filohan’ny tetezamita nandritry 5 taona. Olony no lasa filoham-pirenena ny taona 2013 hatramin’ny 2018. Nahavita fotoam-piasana maha filoham-pirenena, izay natao haharitra 5 taona indray izy farany teo, raha ny tokony ho izy, saingy na nitabataba mikasika ny fifidianana nokarakaraina manaraka mbola nahalany azy izao fanindroana izao ho tsy mifanaraka amin’ny lalàmpanorenana aza moa ny mpanohitra dia iny izy tafapetraka eo ihany iny. Nojeren’ny fitsaràna tokony hiadidy izany fotsiny ny resaka zom-pirenena na «nationalité» maha malagasy voalaza ho efa tokony ho very taorian’ny fiofon’ity filoham-pirenena malagasy ity ho teratany frantsay na ilay antsoina hoe «naturalisation». Nifarana talohan’ny 20 janoary, izay fe-potoana tokony hifaranany marina ny fe-potoam-piasan’ilay filoham-pirenena natao hitondra nanomboka ny taona 2019-2023. Nojerem-potsiny koa izany. Heverina ho tsetsatsetsa tsy aritra tsy azo lalovana fotsiny daholo anefa izany rehetra izany fa rehefa natao izany ny tombana tao anatin’izay 15 taona mahery nahazoana fitondrana izany dia tsy nahavaha fa vao mainka nahatonga olana maro teto amin’ny firenena ny fijoroan’izao fitondram-panjakana ankehitriny izao. Mitombo ny olan’ny rano sy herinaratra. Mitombo vokatr’izany koa ny tsy fisian’asa sy fahaverezana aza. Mitombo ny endrika tsy fandriampahalemana, mba tsy hilazàna hoe mitombo ny tsy fandriampahalemana. Hita tato anatin’izao fitondrana izao daholo ary nirongatra mihitsy ny fakàna voamasona varira, ny fanapahan-doha, ny fakàna an-keriny, ny asan-dahalo sy rehefa mety ho endrik’izay tsy fandriampahalemana izay. Niakatra ny vidim-piainana. Nidina hatrany ny sandan’ny Ariary. Nitotongana ny tontolon’ny asa sy sehatra maro, izany hoe, ny ankapoben’ny fiainan-dRamalagasy mihitsy. Mipetraka izany ankehitriny ny fanontaniana hoe ahoana izany izao no fomba hamahan’izao fitondrana izao olana taorian’ireo olana rehetra voavoly tao anatin’izay 15 taona izay?
J. Mirija