Aingam-panahy no hitondrana firenena ?

ary efa vita ny sary, mihoatra ny 80metatra. Tena avo dia avo, fa hisy adihevitra kely fotsiny hatao eo amin’ny filankevitry ny Minisitra satria misy safidy roa, ka amin’ny maha Malagasy dia « aloalo » sa « lakroa » hanamarika ny finoantsika. Afaka hiakarana any ambony any ary tena goavana be, hoy i Andry Rajoelina, filoha ankehitriny. Noraisina ho ohatra moa ilay tsangam-bato goavana miendrika sary olona na ny « Christ the Redeemer» any Rio de Janeiro Brésil. Hatramin’ny faran’ity taona ity no nampanantenana fa tsy maintsy hahavitan’izany. Zary lasa adihevitra moa ny momba io tena izany ve no maika sy laharam-pahamehana amin’izao fahasahirana sy fahantran’ny firenena izao ? Rehefa dinihina, te hametraka ny anarany hatrany, te hametraka tantara hoe : izaho no nahavita an’itsy zavatra goavana sy mijoalajoala tahaka ny Tour Eiffel any Frantsa, ny Statut de la liberté any Etazonia, ny Taj Mahal any Inde,… Izany ve ny mahaseriny sy maha somokotra ny fitondrana kanefa ny dabilio ho an’ny mpianatra aza miapanga tena ny Fanjakana fa 45000 amin’ny 2 000 000 ihany no zakan’ny tetibolam-panjakana. Ny toekarena mitotongana ambony ambany, ny sandam-bola tsy sasatry ny mitrosona, ny vidim-piainana tsy zaka, ny olona miha mahantra fadiranovana, ny làlana tapitra potika, ny tsy fandriampahalemana tena efa zava-doza,… dia hanangana « monument » goavana no resaka mivoaka. Mampametra-panontaniana ihany hoe : tena programa sy fandaharan’asa mazava ve no hitondrana ny firenena sy handaniana ny volam-bahoaka sa hoentina amin’ny aingam-panahy ka taitaitra sy manonofy ao dia hoe : andao isika hanangana « monument » goavambe ? Tena izany ve no hoe : « Madagasikara tsy maintsy mandroso ? Toa mampahatsiahy an’ilay hoe : hanafatra ireo karazam-biby tsy fahita eto toy ny liona, elefanta, zebra,… mba hisintonana mpizahatany, izay tena nampanongo tena ny maro. Ny famaritana ny fampandrosoana sy ny fandrosoana mihitsy aloha no mila iadian-kevitra sy faritana ho an’i Madagasikara fa toa hoentina amin’ny politikan’ny haingo ambony tsikoko hatrany ka mahavita « monument » goavana, mahavita teleferika hitrosana vola tsy toko tsy forohana, mahavidy « logiciel » 14 tapitrisa dolara tolo-botsotra hitsikolovana ny gasy,… fa tsy mahavidy dabilio ho an’ny mpianatra, tsy manana politika mazava ho an’ny famoronan’asa, efa maty mosary ny Malagasy vao hoe andao ampiana ny tantsaha,… Raha miverina amin’ny Tanamasoandro fotsiny: tena vita araka ny nambara hatrany am-piandohana sa fanombohana isaky ny misy fitsidihana any Imeritsiatosika ? Aiza ilay « Fly over » etsy Anosizato sy Ampasika izay nambara fa hifanohy makany ? Mby aiza ny «Autoroute » miazo ny Tanamasoandro.
Légende : Ity tsangam-bato goavana « Christ the Redeemer » manan-tantara sy mampiavaka an’i Brésil natsangana nanomboka ny taona 1922 ary vita ny 1931 ity ity indray izany no niaingan’ny aingam-panahy etsy Imeritsiatosika.
Toky R