Antoko AVI

sy ny fianakaviany manontolo noho ny naha lavo ny zanak’izy ireo, hoy ny solombavambahoaka sady filoha mpiara-mitantana ny antoko politika Asa vita ifampitsaràna na AVI, Andriamiharivolamena Zavamanintra. Hetraketraka ara-politika, hoy izy, no namonoana ny zanak’io ben’ny tanàna lany tamin’ny anaran’ny antokonay io. Izany indrindra no antony hanehoanay etoana ny alahelonay. Mpikambana feno ao anatin’ny AVI io ben’ny tanàna io. Mijoro izahay hitady ny marina sy hitaky ny famaizana sahaza izay nahavanon-doza satria sady namoizana ain’olona ny raharaha no manaratsy endrika ny fitondràna mijoro amin’izao fotoana izao. Miara-miasa akaiky amin’io ben’ny tanàna io, noho izany, ny AVI amin’ny fametrahana ny fitoriana amin’ireo ambaratonga rehetra. Tsy hanaiky mora izao toe-draharaha izao izahay satria ny antoko AVI iraimanontolo mihitsy no voakasika anatin’izany. Hanara-maso akaiky sy hijery ifotony izay ivoahan’ny marina ao anatin’izao raharaha izao izahay. Vaovao voamarina avy any ifotony sy azo lazaina mihitsy hoe ofisialy no voaray eto am-pelantananay. Mazava ny zava-nitranga fa disadisa teo amin’ny ben’ny tanàna lany ara-dalàna amin’ny anaran’ny antoko AVI tamin’ny salan’isa ambony dia ambony sy ny mpifaninana aminy izay tsy nahazaka resy tamin’ny fifidianana. Rehefa lany ny ben’ny tanàna tamin’ny anaran’ny antokonay dia nisy ny fandrahonana sy fanakorontanana izay nitohy tamin’io tranga mahatsiravina io. Nametraka karazana taratasy fampilazàna sy fampandrenesana ny lehiben’ny distrikan’i Bekily moa ny AVI ary nampahafantatra ny lehiben’ny zandary sy distrika rehetra any hoe tsy azo tsinontsiniavina ny grevy ataon’ireo tsy lany ireo. Efa nivoaka ny teny fa hifofo ny ain’ny kandidanay ilay kandidà tsy nanaiky resy sy ireo mpiaradia aminy.

TSY NISY FANDRAISANA ANDRAIKITRA
Ny nahagaga dia marina fa mety nisy ny fandraisana ny andraikitra tandrify ireo tomponandraikitra kanefa dia io niafara tamin’ny famonoana io ihany ny zava-misy. Efa nilaza tao anatin’ny taratasiny ny ben’ny tanàna lany tamin’ny AVI fa nisy nilaza hifofo ny ainy. Raha tena nisy ve ny fandraisana andraikitra araka ny tokony ho izy nataon’ireo tomponandraikitra tao anatin’izay volana maro izay dia ho tonga amin’izao famonoana olona izao? Nampandre ny tomponandraikitra nanoloana ny zava-nisy ny teny an-toerana rehefa nisy nanafika ny fonenan’io ben’ny tanàna io. 12km miala ilay kaominina no misy ny tobin’ny mpitandro filaminana nampandrenesina. Naninona no adin’ny 4 na 5 aty aoriana ry zareo no mbola tsy tonga? Fanafihana miaraka amin’ny pilotra sy basy ataona andian’olona an’ilay trano no tatitra voarainay, izany hoe fanafihana nataona jiolahy fa tsy fitsaràm-bahoaka, araka izay aely amin’izao fotoana izao. Tafihana dahalo ve moa ny tranonareo dia tsy hamaly ianareo? «Légitime défense» na fiarovan-tena no filaza izany. hanananay ny porofo mikasika ny lazainay rehetra. Efa miparitaka amin’ny tambazotra rehetra any moa ilay fitarainana nataon’ny ben’ny tanàna izay nanononany anaran’olona maro. Tsy ahiahiany intsony, araka izany, ireo andian’olona ireo fa efa fantany. Miantso ny fitonian’ireo mpikambana AVI izahay na izany aza. Tranga iray ity izay tsy azo hamaritana avy hatrany ny toetran’ireo mpiara-miasa amin’ny fitondràna ankehitriny rehetra anefa ity, hoy hatrany ity depiote ity.
J. Mirija