Antoko politika Les Phares

dia mandray anjara foana amin’ny raharaham-pirenena, hoy ny filohan’izy ireo, Rafanomezantsoa Georges. Na tsy nandray anjara mivantana aza izahay, hoy izy, dia nanana kandida notohanana. Iombonanay ny tenin’ny filoham-pirenena hoe tokony ho hajaina ny safidim-bahoaka. Tokony tsy ho ahodinkodina ny vokam-pifidianana. Inoana fa olon-kendry ny tomponandraikitra eo anivon’ny HCC sy ny CENI, izay namoaka ny vokatra vonjimaika farany teo. Tsy tokony hiova firy amin’ny vokatra navoakan’ny CENI ny an’ny HCC satria raha sanatria, averiko im-pito ny hoe sanatria, misy fiovana be kosa izany dia mety hiteraka savorovoro eo amin’ny mpifidy sy ho an’ny vahoaka izany. Inoana fa tsy hisy hanana tombontsoa amin’izany na ny tomponandraikitra na ny vahoaka ka mangataka ny ‘Lay FAR hoe aoka ho hajaina ny safidim-bahoaka! Mbola lavitra ezaka be ny resaka hoe fanovana rafitra. Inoana fa tsy izany izao no laharam-pahamehana eto Madagasikara. Mbola ny lafiny ara-toekarena sy sosialy izao no tokony jerena akaiky. Resaka rafitra izany, resaka fitantanan-draharaham-panjakana manontolo mihitsy. Ny manova izany mbola mila fotoana lava fa tsy vita ao anatin’ny fotoana fohy. Ny tanjaka ara-toekarena izao no hitako hoe tokony himasoana. Tsy misy afa-tsy ny fitoniana na «stabilité» ihany no ahatongavana amin’izany. Rehefa misy ny fitoniana ara-tsosialy dia teraka fitoniana ara-toekarena. Rehefa mandry fahalemana ny firenena dia afaka mamokatra ny vahoaka dia mitony ho azy koa ny politika rehefa afaka mamokatra ny vahoaka. Tokony hamorain’ny fanjakana noho izany ny fahafaha-mamokatra eto amin’ny firenena. Madagasikara izao, ohatra, firenena natao hamboly dia tokony asandratra izany ny sehatry ny fambolena na «secteur primaire», ny asa tanana. Tonga eto Madagasikara izao ny namantsika avy ao amin’ny nosy rahavavy Maorisy sy ireo sehatra iraisampirenena samihafa hanao ny foara iraisampirenena momba ny asa tanana dia tokony ampian’ny fanjakana izany ny fampiroboroboana sy fanomezana sehatra bebe kokoa ireny. Hanampiana azy amin’ny lafiny ara-pitaovana sy ara-bola indrindra indrindra, hoy hatrany ny antoko politika Les Phares.
J. Mirija