CENI_Fifidianana ben’ny tanàna

raha ny valan-dresaka nataon’ny CENI ny alarobia lasa teo, namelabelatra ireo teboka samihafa mikasika ny zotram-pifidianana. Efa nivoaka avokoa ny didim-panjakana: fanomanana ny fifidianana, fandraisana anjara amin'ny bileta tokana, fanaikana ny mpifidy. Efa nahazoana alalana tamin'ny filankevi-panjakana ny fahafahana manao fifidianana amin'ny fahavaratra ary nisy rahateo ny « avis » avy amin'ny HCC ny 25 janoary 2024 fa tsy maintsy atao amin'ity taona ity ny fifidianana Ben'ny tanàna, hoy ny eo anivon’ny CENI tamin’ny alalan’ny Filohany Atoa Dama Andrianarisedo. 1 200 000 hatramin’ny 20 000 000Ar ny antoka na « caution » arakaraka ny sokajin’ny kaominina. Lisitra no fidiana amin’ity, izany hoe : anaty lisitra iray ny ben’ny tanàna sy ireo mpanolontsaina monisipaly miaraka aminy, ary miainga amin’ny vato azo ny kajikajy amin’ny toeran’ny mpanolontsaina. Tsy tafiditra ho mpanolontsaina kosa anefa ilay kandida ben’ny tanàna tsy lany. Ny 5-10 Septambra: fandraisana antontan-taratasy. Ny 12 oktobra no hamoahana ny lisitra sy biraom-pifidiana misandrahaka amin’ireo kaominina 1695 manerana ny Nosy. Ny 19 novambra hatramin’ny 09 desambra kosa no hanatanterahana ny propagandy, ary 24 desambra farafahatarany no heverina hivoahan'ny ny voka-pifidianana vonjimaika,... Ny lisi-pifidianana nofaranana tamin’ny 15 mey hatrany kosa no hiasa na mandeha aza ny fanavaozana isan-taona. Milaza ny Filohan’ny CENI fa hafafana miroso amin'ny fifidianana ben’ny tanàna ny toe-bola misy ao, izay 52 miliara Ar no voasoratra ao anaty lalàna mifehy ny tetibolam-panjakana, ary tsy misy afatsy io aloha izany hatreto. Milaza ho tsy midika fa manda fanampiana anefa ny CENI. Momba ny ahiahy ara-pifidianana maro toy ny fitanana an-tsoratra na « PV » hosoka izay mety miainga amin'ny Birao fandatsaham-bato na eny antenantenany, dia milaza ny CENI fa mametraka lamina hisian'ny antoka fa tena izy. Tsy afaka hitompo teny fantatra fa tsy misy ny hosoka, saingy tsy voatery ho ny PV avoakan'ny rafitra nanao hosoka no avoakan'ny CENI, fa tena miezaka manao fampitahana, hoy ny Filohany. Nanambara fa tsy tompon'andraikitra amin'ny zavatra olona iray, fa manao ny fomba rehetra hitandroana ny bileta mba tsy ho very eny antenantenany,... Anjaran'ny rehetra ny mitoroka sy mampahafantatra ny CENI, misy « chaîne de sécurisation » na dingana fiarovana, ary fantatra raha bileta namboarina ivelany, hoy hatrany ny CENI izay naneho fa tsy miditra amin'ny fifanolanana na « contentieux » fa andraikitry ny filankevi-panjakana izany.
Toky R