Depiote Todisoa Andriamampandry

Tonga nanatitra ny antontan-taratasy firotsahan-kofidiany teny amin’ny OVEC Ambohimanarina ny depiote Todisoa Andriamampandry sy ny mpiray lisitra aminy nahitana an’i Dr Miharisoa, Atoa Ravolana, ary Rtoa Rabemololo ny sabotsy lasa teo. Izy 4 mianadahy ireo no hisalotra ny lokon’ny Vovonana Firaisankina, ary vao fanaterana dosie ny sabotsy teo, dia efa vahoaka sesehana no tonga nanotrona ny fanaterana dosie, naneho ny fahatokisany hatrany an’ity depiote ity. Matoa izahay tonga amin’izao indray dia noho ny fangatahan’ny vahoaka hanohy ny ezaka indray, noho ny fanendren’ny Antoko TIM sy ny Filoha mpanorina, ary ny vahoaka nanome hatrany ny fitokisana, ka vonona indray izahay ny hisalotra an’izay maha kandida izay, hoy ny depiote Todisoa. Maro, hoy izy, ny zavatra vita, ary betsaka ny ezaka izay natao, ary maro ny fiaraha-miosina tamin’ny vahoaka na an-tsaha na an-tanàna. Mahita ihany koa anefa fa betsaka ny zavatra mbola tiana harenina eto Ambohimanarina, ary tsy Ambohimanarina irery, fa ho an’i Madagasikara iray manontolo, hoy hatrany ny Depiote Todisoa Andriamampandry. Ity fifidianana ity noho izany no kihon-dàlana farany hahafahana manavotra an’i Madagasikara, ka antony hijoroan’izy 4 mianadahy hitondra ny feon’ny vahoaka, tsy hanaiky ny gaboraraka, hitondra anjara biriky amin’ny ady amin’ny fahantrana. Isika no hanarina an’i Madagasikara satria efa leo sy tofoka amin’izao fitondrana izao ny vahoaka Malagasy. Notsiahivin’ity depiote ity fa tamin’ny fifidianana depiote farany teo, dia efa nanakaiky ny poa-droa izy ireo, kely ny elanelana, ka fanamby iarahana amin’ny vahoaka izany. Hoporofoina fa aty amintsika ny vahoaka satria leo tsy firaharahiana, olana, rano tapaka, fiakaran’ny vidim-piainana, tsy fananan’asa,… hany ka lasa ny depiote izay mpanao lalàna no miditra an-tsehatra manao ny asan’ny mpanatanteraka, hoy ny fanamarihan’ny depiote Todisoa Andriamampandry. Nambarany fa mirindra tsara ny vovonana Firaisankina ao amin’ny Boriborintany faha-6 izay ahitana ny TIM, HVM, APM, Tsara Tahafina, ary ny Pro-Siteny, ka miara-mientana amin’ny fanohanana ny lisitra tarihiny. Fifaninanana masina, ka vonona hisedra an’izany, efa zatra misedra fifidianana, ary mino sy manantena fa hivoaka mpandresy. Naneho ny kolontsaina firahalahiana na « fair-play » ihany koa ny depiote Todisoa Andriamampandry, ka nankasitraka sy ny nisaotra ny depiote Max, izay solombavambahoaka niaraka taminy tao amin’ny Boriborintany faha-6, izay tsy nolanian’ny IRD ho kandida intsony. « Misaotra anao fa na dia tsy nitovy hevitra ara-politika aza isika, dia nisy ny fifanajana, nisy ny fiaraha-miasa teo amintsika sy ianao, isaorana ianao tamin’ny vitanao teto Ambohimanarina. Asehontsika amin’ny vahoaka fa ny fihavanana aloha no voalohany indrindra, ka isaorana ianao ny amin’izany, fa izahay dia hanohy ny tolona sy ny asa nankinin’ny vahoaka sy hanarina ny tsy mety eto amin’ny tany sy ny Firenena », hoy ny depiote Todisoa Andriamampandry.
Toky R