Dian’i Macron eto, tsindry goavana diplaomatika !

izay misahana ireo teratany frantsay ivelan’i Lafrantsa. Tamin’ny 25 febroary lasa teo, dia nandefa taratasy ho an’ny Filohan’i Frantsa izy, mangataka ny fitakiana amin’ny fomba ofisialy ny famotsorana ity teratany frantsay ity. Ao anatin’ny fanomanana ny Fihaonamben’ny Filoham-pirenena ao amin’ny Vaomieran’ny Ranomasimbe Indianina (COI), izay hatao any Madagasikara amin’ny 24 avrily, dia asongadina amin’ny taratasy fa ilaina ny fijerana ny raharaha Paul Maillot. Manamboninahitra teo aloha tao amin’ny zandary frantsay izy, ary voafonja noho ny raharaha “Apollo 21”. Nilaza ilay loholona fa miharihary fa fitazonana tsy ara-drariny no atao aminy, ary toa lasa fitaovana amin’ny fifandraisana ara-diplaomatika eo amin’i Madagasikara sy Frantsa izy. Efa ho 4 taona i Paul Maillot no migadra amin’ny sazy 20 taona an-terivozona. Lazain’ny Frantsay fa ao anatin’ny fepetra tena sarotra izy: mitokana ao anaty efitrano maizina, tsy manana trano fidiovana, ary tsy omena sakafo avy amin’ny fonja. Ny zanany vavimatoa irery no miantoka ny fahavelomany avy any Frantsa, amin’ny ezaka ara-bola mihasarotra. Notsindriana fa tsy fanomezana sakafo fotsiny no olana, fa efa tena marefo ara-pahasalamana izy ary atahorana ny ainy. Tsiahivina fa tamin’ny 2023, dia navela hody any Frantsa i Philippe François, voasazy noho ity raharaha ity ihany, saingy 10 taona an-terivozona no sazy azony. Takian’ny Frantsay ny fahafahana mamindra an’i Paul Maillot toy io namany io. Notsikerain’ny Frantsay fa ny zom-pirenena roa ananany dia natao ho fialana bala amin’ny tsy famoahana azy, kanefa tsy tokony hisy fanavahana amin’ity raharaha ity. Nambaran’ilay loholona fa tokony hanome fanampiana feno i Frantsa fa tsy hifetra amin’ny fanehoana fanohanana ara-kevitra fotsiny. Notsiahivina fa ny Vondrona Miasa momba ny Fitazonana Tsy Ara-drariny ao amin’ny Firenena Mikambana dia namoaka fanapahan-kevitra laharana faha-36/2024, izay nanamafy fa fitazonana tsy ara-drariny no atao amin’i Paul Maillot, ka mangataka ny famotsorana azy avy hatrany. Araka izany, amin’ny fifandanjana vaovao amin’ny fifandraisana ara-diplaomatika irina amin’i Madagasikara, dia angatahina mba hatao laharam-pahamehana amin’ny dian’ny Filohan’i Frantsa any Madagasikara ny famotsorana an’i Paul Maillot, hahafahany mody any Frantsa haingana. Tafiditra amin’ny hasin’ny diplaomasia frantsay izany, amin’ny fahafahantsika mandray andraikitra, amin’ny fahamboniana sy ny fahaleovantenan’i Frantsa amin’ny fifampiraharahana, hoy ity taratasy. Mandeha ny tsindry hamotsorana an’i Paul Maillot, raha tsy nampidirina tao anatin’ny lahadiniky ny fihaonamben’ny COI kosa ny raharaha Iles Éparses. Isan’ny iaraka hataon’i Macron ny hampody io zandary Frantsay misotro ronono io ?
Toky R