Fanoherana ny fametrahana Filoha vazaha

hoy ny Collectif des candidats nandritra ny diabe am-pilaminana omaly. Niainga teny Ambatomainty, nandalo an’Amboditsiry, Andranobevava ary nifarana teny Analamahitsy. Manomboka rahampitso alarobia : mivoaka eny an-dalambe daholo isika hampisehoana fa an’ny vahoaka ny fahefana ary tsy manaiky fifidianana feno hosoka sy halatra isika. Vahoaka mahay manoratra ny tantarany ny Malagasy fa tsy ny any ivelany no hanoratra azy, hoy i Hajo Andrianainarivelo ; tsy vizana miaro an’i Madagasikara isika, tsy voavidy vola ary ataontsika feno vahoaka eny an-dalambe mitsipaka io fifidianana jiolahim-boto sy feno halatra io, hoy hatrany izy. Mila mijoro ho an’i Madagasikara isika ary tsy ekentsika ny fifidianana hampandaniana vazaha hitantana an’i Madagasikara, tsy mila fifidianana halatra hanabadoana ny Malagasy. Tsy azontsika atao ny mampianatra ny taranakantsika hangalatra.halatra manara-penitra no misy eto amin’izao, tsy mety izany. Mitsangana ry tanora,aza manaiky intsony, hoy ny Firaisankinan’ny kandida izay nanamafy ny tsy fandraisana anjara amin’ny fifidianana, ary naneho fa hanamafy hatrany ny tolona.
HO POTIKA TANTERAKA RAHA TSY IZAO NO MIADY
Nasongadin’ny vondron’ny kandida fa raha tsy izao ny Malagasy no miady dia ho potika ity firenena ity, mijoro androany sy rahampitso, ary tokony ho sahy hijoro foana hanarina ny firenena. Nisintona ny sain’ny rehetra ny vondron’ny kandida ary niteny nahitsy hoe : rehefa jerena ny lafin-javatra maro dia mbola voababo, bola voazanaka isika, Malagasy. Amin’izao taona 2023 izao ve dia jiro atao amin’ny tranon’akoho no ampanantenaina anao, hoy i Brunelle Razafitsiandraofa teny Analamahitsy . Tsy izany no hahafahanao mandroso, tsy izany no hahafahan’ny isan-tokantrano mivoatra, hoy izy. Hentitra io kandida io nanamafy fa mitohy ny tolona, ary tsy maintsy hafahana eo ambany vahoan’ny mpanjanantany ny firenena. Rehefa henoina ny fanehoankevitry ry zareo dia tsy misy zavatra mifahatra, tsy misy zavatra ahafahana miala amin’izao fahantrana iza. Zavatra tsy misy fakany, endrika ivelany, tsy misy dikany na « n’importe quoi ». Izahay dia miombona hoe avelao hadio, zarainay ny hevitra fa fantatray ny hamoahana ity firenena ity ho tonga firenena matanjaka, hoy izy.
MIHATSARAVELATSIHY MODY TSY NANAKANA
Nahitsy ihany koa ny Filoha teo aloha Hery Rajaonarimampianina nilaza fa mihatsaravelatsihy sy matahotra mafy ny fitondrana nanomboka ny alatsinainy teo, mody tsy nasiana mpampihorohoro satria eo ire mpanara-maso iraisam-pirenena dia matahotra. Na ho inona na ho inona zava-misy dia isika mandroso foana, tsy ekena ny fifidianana feno hosoka. Raha tsy izao no mijoro dia vao mainka ho potika ny firenena, ka tsy maintsy mijoro isika, hoy i Hery Rajaonarimampianina. Mangetaheta fiovana ny Malagasy, tsotra ny antony hitarihanay vahoaka dia ny hanavotana ny firenena. Tsy matahotra izahay na aiza na aiza alehanay. Misy miteny fa tsy tokony hitarika vahoaka ka inona no hanaovana politika ? Mila ianarana ny politika fa tsy mandehandeha ho azy, hoy kosa i Marc Ravalomanana. Aza manao politika raha saro-tahotra, fa isika tsy maintsy mamonjy vahoaka. Tsy maintsy atao ny fitakiana raha tsy tratra ny tanjona. Tsy mankasitraka velively ny fifidianana izay hatao amin’ny faha-16 novambra. Raha tsy hahemotrareo io fifidianana io, dia tena hisy krizy mahatsiravina eto, hoy i Marc Ravalomanana.
Toky R