Fitantanana tsy matotra

mila olona tena niomana, fahaiza-mijery ny laharam-pahamehana, programan’asa matotra paikady mahomby sy matotra ara-teknika sy ara-bola,… ny fitantanana Firenena. Ny zava-miseho eto anefa toa fitantanana manjavozavo sy tsy matotra, ka isan’ny endrika isehoany ny tetikasa maro izay resahana sy atomboka ka eny antenantenany vao mitady mpanome vola. Betsaka rahateo no tsy programan’asa voafaritra mazava anaty tetibolam-panjakana, fa indraindray entin’ny aingam-panahy eny antsefatsefany eny ny mpitondra. Iny nametrahan’ny Firaisamonim-pirenena fanontaniana iny ohatra ny « Lac Iarivo » hoe : avy aiza marina ny famatsiam-bola ? Tena misy tombotsoam-bahoaka ve ? Ny valiny dia lazaina fa manohitra be fahatany ! Mifankaiza amin’izany ny Tanamasoandro, ny Orinasa Gascar aza moa tsy nitsangana mihitsy,… Dia io ihany koa ny « Autoroute » izay ny tapany voalohany aza nihemotra hatrany ny fahavitany raha nolazaina fa ho vita hatramin’ny faran’ny 2023 ny 80km. Ny tohiny mbola manjavozavo ka vao ny faran’ny herinandro teo no nilazana fa vonona hamatsy ny fanamboarana ny tapany faharoa ny BADEA na ny Banky Afrikanina momba ny fampandrosoana ara-toekerana. Làlana tsy mbola voafaritra mazava ny zotrany na « tracé » ve dia hisy hamoaka vola amin’io, hoy ny diplaomaty Malagasy iray. Ny « Fly over » 80 tapitrisa dolara nolazaina fa hovatsian’ny BADEA aza efa 5 na 6 taona no nolazaina fa hatomboka mandrak’ity ny androany mbola ny eo ihany eo mainka fa famoahana 250-350 tapitrisa dolara ? Ny RN13 izay mahatratra 492KM nanaovana resabe tamin’ny andron’ny « coronavirus » fa tsy hanao politika raha tsy vita, fa hatreto ny tapany voalohany 100km mahery kely no natao, mbola ny orinasa lehibe iray any amin’iny faritra iny aza no mitondra vola betsaka. Ny tapany faharoa izay tena heriny tsy tena misy resaka ! Tahaka izany ihany koa ny resaka teleferika. Ankoatra ny hoe : tena laharam-pahamehana sa tsia dia nihemo-dava, misy resaka piesy mbola mila vidiana, manahirana ny ara-bola hanodinana azy, ny « train urbain »,... Ny angovo efa hatramin’ny 2018 ny 400MW anatin’ny 5 taona fa hatramin’izao mbola mitangirika vola amin’ny sinoa, arabo, Eoropeanina,... Mila 7,2miliara dolara ny « Pacte énergétique », 1,15 miliara no mety homen’ireo mpiara-miombon’antoka, mbola baraingo ny ahitana 6,1% miliara dolara,… Betsaka ny tetikasa tahaka izany izay tsy zakan’ny famatsiam-bola madiodion’ny Fanjakana na RPI kanefa tsy manjavozavo ihany koa izay hamatsy azy. Endriky ny fitantanana tsy matotra !
Toky R