Lisi-pifidianana mampiahiahy

Betsaka ny lesoka sy ny ahiahy mikasika hosoka avo lenta. Iantefan’izany voalohany ny resaka lisi-pifidianana tamin’ny fampidirana mpifidy vaovao tamin’ny alalan’ny « ordonnance », izay toa nentina nanabontsinana ny lisitra tamin’ny alalan’ny fanenjehana isa, rehefa tena zohiana. Nirarakopana ny anaran’olona tsy fantatra mazava ny anaran’ny Ray (Père Inconnu na PI) sy reny (Mère inconnu na MI) tao anatin’ny lisitra navoakan’ny CENI. Misy anarana tonga dia mifanesy be tahaka ny Raharimalala dia ampiana fanampin’anarana, izay efa 40 isa misesy izay « PI » avokoa, ary zanak’i Raharimalala avokoa ho an’ny reny. Tahaka izany ihany koa ny Rafanomezantsoa am-polony mahery tsy misy rainy, ary Rafanomezantsoa avokoa ny reniny. An-jatony ihany koa ny anarana tsy misy Ray aman-dreny, ka ny fanampinan’anarana no naverina amin’ny anaran’ny reny. Be loatra ireo zavatra mampiahiahy, nahoana no olona efa an’arivony no lazaina fa tsy fatatra ny rainy na tsy fantatra ny reniny, na tena hoe tsy fantatra ny ray sy reniny. Ankoatran’izay hafahafa be ny voasoratra eo amin’ilay hoe anaran’ny reny niteraka. Ohatra : Arthur, John, Koto, Olivier, Son.Olivier Rochel, Alain Jean De Dieu, Thomas Jean Noel ….izany ve dia anarana vehivavy ? Ary raha ny fahitana azy dia fanampin’ananarana , tsy misy anarana fa tahaka ny hoe nosoratana sy napetraka maimaika fotsiny. Tsikaritra ihany koa omaly maraina ary naharitra ora vitsivitsy ny tsy fahafahana niditra tamin’ny tranonkalan’ny CENI nahafahana nijery sy nanamarina ny anarana. Nisy ireo antoko sy vondron’antoko nangataka sy nitaky ny lisi-pifidianana sy hamoahana azy ofisialy, saingy tsy nahazo valiny hatramin’ny farany. Ny Antoko Tia Tanindrazana tarihin’i Tahina Razafinjoelina dia anisan’ny nanao an’io efa iray volana lasa, ary mbola nampiasa ireo vondrona mpahay lalàna na « équipe juridique » saingy tsy tena nisy ny valiny mahafa-po avy tamin’ny rafitra mpikarakara ny fifidianana. Tsiahivina fa 68 479 ny mpifidy nampidirina tamin’ny « ordonnance » ka ho an’Antananarivo, dia mahatratra 45 728, Antsiranana 10 074, Fianarantsoa 1316, Mahajanga 2418, Toamasina 1418, Toliara 7525,…
Toky R