Lova Fanantenana Andriamparany na Doda

taona hoavy anaty fitondran’i Andry Rajoelina, hoy ny mpandinika raharaham-pirenena, Lova Fanantenana Andriamparany na Doda. Ankoatran’ny minisitra miisa 27 moa dia hoe hametraka sekreteram-panjakana izy ireo, hoy izy. Misy tsy tokony hananganana izany angamba ny sasany fa ny minisitera misy azy ihany dia mahavita an’izay. Ny fahaiza-manao sy traikefa anaty sampan-draharaha no tokony hamafisina fa manjary mandany volam-bahoaka. Fomba fanao hatramin’izay satria lany koa ny fotoam-piasan’ny solombavambahoaka, indrindra, ny ben’ny tanàna, dia tanjon’ny fitondrana ny hahazo maro an’isa hanamafisana kokoa ny fahefana sy hanaporofoana fa mbola matanjaka izy. Hitondra fampandrosoana marina ve izay? Ho hitantsika eo. Fotoam-pitondrana faharoa sady farany io ho an’ny filoha Andry Rajoelina raha ny lalàmpanorenana no jerena. Ny 5 taona voalohany azo lazaina hoe sahirana ny firenena, ny fitondrany, ny vahoaka, raha ny mari-drefin’ireo mpiara-miombon’antoka any ivelany sy ny hita maso eto amin’ny firenena. Raha ny fijery azy dia hanova famindra sy tetika ny fitondrana ankehitriny. Antananarivo manokana dia io iaraha-mahita io ny azo lazaina hoe tsy fahombiazan’ilay ben’ny tanàna nolazaina fa zanaka an-tranon’ny fitondrana. Potika ny fitondrana. Potika ny renivohitra. Ny loto isan-karazany. Ny fako tsy voaraoka tanatin’ny volana maro. Mitovitovy amin’ny tamin’ny taona 1990 tany ho any izao fikorontanana sy loto eto Antananarivo izao. Repoblika faharoa niampita tamin’ny tetezamita ho any amin’ny repoblika fahatelo izany. Nisy ny fanamboarana nataon’Itompokolahy Guy Willy Razanamasy. Nanadio ny tanàna tamin’ny endriny rehetra. Nahitana fahombiazana izany dia notohizan’ny fitondrana Ravalomanana. Tonga ny taona 2009 dia nikorosofahana indray i Antananarivo. Azo lazaina hoe zanaka an-tranon’ny fitondrana foana no nitondra an’Antananarivo nanomboka teo hatramin’izao 2024 izao. Ny vahaolana politika ve no tsy hananana sa ilay mitondra mihitsy ve no tsy hay? Mahamenatra hoe eny afovoan-tanàna, eny Anosipatrana no hanariana fako. Mariky ny tsy fahombiazana ireny ary mitarika aretina sy avoretrana, hoy hatrany ny tenany.
J. Mirija