Milaza miandry fampahafantaran’ny fitsarana ny TIM

taorian’ny fitsipahana ny firotsahany teny amin’ny CENI sy ny Fitsarana misahana ny ady amin’ny Fanjakana, dia tsy mbola izay no nitranga ho an’ny omaly. Raha izay no nivoaka tamin’ny seraseran’ny Firaisankina nialoha an’io, izay nilazan’ny depiote sady Filoha lefitra mpanohitra eo anivon’ny Antenimierampirenena Atoa Siteny Randrianasoloniaiko ny alatsinainy teo, dia mbola tsy tonga tamin’io. Anarana maro anefa no efa niparitaka, eny fa na ny depiote Fidèle Razarapiera aza dia efa nanambara, fa eo am-pikarakarana dosie ny zanaky ny Filoha teo aloha dia i Tojo Ravalomanana, ka raha ny hevitr’io depiote io dia tsy misy adihevitra raha ho ity farany tokoa. Raha tsy tafavoaka io, dia ny depiote Hanitra Razafimanantsoa, ary raha tsy ity farany dia ny depiote Todisoa Andriamampandry, raha ny hevitry ny depiote voafidy tany Ambatonandrazaka. Nolazainy fa tsy mety intsony ny handrotsahana an’i Rina Randriamasinoro satria efa tsy nahomby. Nilaza kosa ny Sekretera Jeneralin’ny TIM dia ny depiote Rina Randriamasinoro omaly, fa mbola tsy tonga eny am-pelantanan’izy ireo ny fampahafantarana na « notification » mikasika ny didy navoakan’ny Fitsarana misahana ny ady ifanaovana amin’ny Fanjakana. « Ny alahady teo dia nolavina ny fitoriana, tsy mbola anaty lisitry ny afaka mirotsaka, mbola tsy nahazo ny fanamarihana na « notification ». Raha ny lalàna 2014-020 dia 24 ora aorian’ny fahazoana an’io « notification » io ny « mandataire » dia manana 48 ora hahafahana manolo ny kandida. Aorian’io vao hivory ny birao politika miaraka amin’ny solombavambahoaka amin’izay hatao», hoy ny Sekeretera Jeneralin’ny TIM. Raha mbola tsy mahazo ny didy sy ny « notification » milaza fa tsy misy hevitra intsony ity izay ireo vao hieritreritra ny fanoloana kandida. Anjaran’ny CENI no mandray fepetra raha toa ka tara ny famoahana an’io, hoy hatrany i Rina Randriamasinoro. Ity farany izay nanitrikitrika hatrany fa ny fanapahan-kevitra tsy maha kandida ny Filoha Ravalomanana dia hamafisina fa fanapahan-kevitra politika, na ny noraisina teny amin’ny CENI na ny teny amin’ny Fitsarana. Hiandry ny kandidam-panjakana na kandida hafa ny TIM vao hamoaka ny azy ? Andrasana indray izany izay mety ho tsy hampoizina ato anatin’ny 24 ora farany na ho an’ny TIM izay ifantohan’ny resabe na ny ho fipoiran’ny kandida hafa mety ho tsy hampoizina saingy mety hanova ny sary rehetra !
Toky R