Mpitondra mandika lalàna…

Voararan'ny lalàna ny fampielezan-kevitra ataon'ireo misahana andraikim-panjakana, ny mampiasa fitaovam-panjakana. Tsy tokony hitanila, na hisahana asan'antoko, na asam-pivavahana ny Filoham-pirenena, araka ny lalàmpanorenana andininy 49, izay milaza fa ny asan’ny Filohan’ny Repoblika dia tsy azo ampirafesina aminà asam-panjakana nahavoafidim-bahoaka, asa aman-draharaha hafa, asa ao anatin’ny antoko politika, vondrona politika, na fikambanana, ary fisahanana andraikitra eo anivon’ny fikambanam-pivavahana. Izay rehetra fandikana ireo fepetra voalazan’ity andininy ity, voamarin’ny Fitsarana Avo momba ny Lalàmpanorenana, dia zary ho antony amin’ny tsy fahafahana miasa tanteraka ho an’ny Filohan’ny Repoblika. Tena voahaja sy hajain’ny Filoham-pirenena ve izany ? Tena narahana ve ny andininy faha-45 amin’ny lalàmpanorenana mamaritra fa iantohan’ny Filoham-pirenena ny firaisam-pirenena ? Ny resaka tsy fampiandaniana ny fitantanan-draharaham-panjakana toy ny fampianarana, ny fitsarana, ny tafika,… iantohan’ny Fanjakana araka ny andininy faha-39 amin’ny lalàmpanorenana moa dia toa efa hatry ny ela no nitsahina raha tarafina amin’ireo endrika fanerena ny mpampianatra hanohana kandida TGV, ny fampiasana fitaovam-panjakana sy fananam-panjakana toy ireo jiro na fitaovana amin’ny anaran’ny Fanjakana toa lasa fitaovana hanangonana olona amin’ny propagandy ankolaka, fihazakazahana manolo ny sefom-pokontany ho TGV,… Mihafamafy ny Fanjakana tsy tan-dalàna. Mbola ilaina ve ny lalàmpanorenana ?
Toky R