Ntsay Christian

heverin'izy ireo fa mendrika ho tendrena praiminisitra hoy i Ntsay Christian omaly teny amin'ny lapan'i Tsimbazaza raha niresaka tamin'ny mpanao gazety izy.
MODY FANINA
Izay tokoa moa no ambaran'ny andininy faha 54 ao amin'ny lalampanorenana, fa raha nanontaniana raha mbola mazoto ho praiminisitra i Ntsay Christian dia niolakolana famaly sy tsapa ho niala bala. Tsy nanao eny, tsy nanao tsia. Tsy niteny ilay fehezanteny malazan'ny mangetaheta toerana hoe : " raha mbola mametraka ny fitokisany amiko ny depiote sy ny filoha dia tsy hiamboho adidy aho", tsy nilaza mazava koa anefa izy hoe : " tsy marisika intsony".
TSARA MPIARO
Raha misy ny olona mahalala zavatra maro eto dia anisan'ity praiminisitra efa nitety vanim-potoana sy fitondrana ity. Raha nisy ny olona nantenaina fa hitondra fanovàna teto dia anisany izy, raha nisy koa anefa ny olona nandiso fanantenana sy nahasosotra vahoaka dia tafiditra ao ihany koa i Ntsay Christian. Ankehitriny, efa ho 7 taona latsaka kely aty aorian'ny nanendrena azy voalohany ho lehiben'ny governanta dia voasokajy ao anatin'ireo mpanao politika politisianina i Ntsay Christian.Malaza ho mahay milomano sy manaraka ny onjany. Mahoraka be koa anefa fa akaikin'ilay mpanefoefo malaza ho mahay mampiteny ny anarany, Mamy Ravatomanga i Ntsay Christian. Asa na izay ny antony namoaharitra azy ao Mahazoarivo na ahoana.
TSY METY AMIN'NY "ORANGE" ?
Etsy ankilan'izay anefa dia namela takaitra teo aminy sy ny antoko TGV Mapar IRD..ilay fitsipaham-pitokisana nitsefotra nataon'ny depiote fony Christine Razanamahasoa filoha teny Tsimbazaza. Niseho masoandro teo mantsy ny tsy fifankahazoan-kevitra na dia nofoanana tampoka indray aza ilay fitsipaham-pitokisana. Hafa politika mazava ho an'i Ntsay Christian sy ny filoham-pirenena ireny hoe misy tsy mety, misy tsy milamina ao aty ilay PM mihitsy no tsy metimety intsony amin'ny depiote. Izay angamba no mahatonga an'i Ntsay Christian mailo be omaly raha nanontanian'ny mpanao gazety. Naleony nody fanina.
RTT