Politika sy fanovana

tanànan'Antananarivo. Nijoro ho ao an-damosiny ny herivelona samihafa, fikambanana, ny manampahaizana, ny mpanakanto, tanora,... izay samy miandrandra rivo-baovao ho an’Antananarivo, eny fa ho an’ny Firenena iray manontolo. Hafa mihitsy no nitondrana ny fampielezana-kevitra nandritra ny 20 andro izay, nanehoana ny asa fa tsy rendrarendra. Tsapa sy hita ny fiaraha-mientana, faharesen-dahatra, fahavononana hiara-dia hitondra rivo-baovao ho an’ny renivohitr’i Madagasikara. Mijoro ny tanora mizara fahaiza-manao, toy ny fiofanana marolafy eny amin’ny Ivotoeran’ny tanora. Mihazakazaka ireo tanora manam-pahaizana manome tànana amin’ny fikarohana momba ny teknolojia hanatsarana ny tanàna tahaka ilay jiro maro maloko izay atidoha Malagasy no nampiasana azy. Tonga ny manam-pahaizana mizara traikefa sy manolo-tànana amin’ny fitantanana sy fikirakirana ny fako mba ho lasa zezika sy fitaovana samihafa, ny fandalinana mikasika ny fikirakirana ny rano,… Mipoitra ny mpitsabo manome fitsaboana sy tan-tsoroka ara-pahasalamana maimaimpoana. Mijoro ny mpanakanto maneho ny faharesen-dahatra sy fifanomezan-tànana ka tsy amin’ny alalan’ny fampisehoana sy fety fa tena amin’ny alalan’ny fanohanana ara-poto-kevitra hoe : izao tokoa ilay fanovana ka mila ampiana. Mahavelom-bolo ny fiaraha-mientana sy fahavononana hitondra aim-bao ho an’ny fanaovana politika eto Madagasikara. Manomboka maro no tonga saina fa ampy izay ny filalaovana politika, fanaovana tohatra fiakarana lava ny vahoaka, fitapitapaka, fampiesonana,… fa tena ny ho avin’ny tanàna sy ny Firenena no mila hifanomezan-tànana satria miara-dia vao mandresy fa tsy mandresy vao miara-dia. Betsaka no maneho fa raha tsaraina amin’ny fo sy saina tsy miangatra, dia tena i Tahina Razafinjoelina no hitondra fanovana, ary hita taratra taratra tamin’ny fahombiazany hatramin’izay, ny zavatra vitany ho an’ny fiarahamonina indrindra fa ny tanora,… Maro no mijoro vavolombelona tsy mihambahamba na ireo tanora novolavolainy na ireo olobe efa niara-niasa taminy, fa tena mendrika sy azo itokisana i Tahina Razafinjoelina. Betsaka ny mety zatra ny làlan-dririnina, maniry hatrany ny hahabado sy hanao kilalao politika ny Malagasy, ka matahotra ny ho very fihinanana vao mahita mpitarika na « leader » hita fa manomboka mampihiratra ny sain’ny Malagasy, mizara fintana fa tsy trondro, mizara fahalalana mba hivoaran’ny isam-batan’olona, fa tsy milalao ny fahantrany sy ny tsy fahalalany amin’ny fividianana azy amin’ny koveta na fanjonoana azy amin’ny vola kely sy Tombola. Miala any ny fanovana !
Toky R