Politika sy fitantanana an’Antananarivo

Ny fahefana azo ihany fa ny sedra miandry mety hangotraka ! Hatreto tsy misy ilay hoe vola tosika manokana nampanantenain’ny Filoham-pirenena. Ny am-pelatanana anefa tsy ampy, azo lazaina ho bitika izany tetibola 79 miliara Ar ao anatin’ny herintaona izany ho ana Renivohi-pirenena. Ny 25% amin’io anefa mety lany karaman’ireo mpiasa manodidina ny 4600. Manginy fotsiny ny mbola famatorana ny Kaominina Antananarivo Renivohitra amina fifanarahana samihafa, toy ny resaka SMGD (Société Municipale de Gestion Digitale) izay asa izay niafarany na hiafarany teo anatrehan’ny fitakiana hamerenana izany ho an’ny Kaominina madiodio ? Ny resaka fampidiram-bolan’ny Kaominina anefa hatreto, zary lasa tari-drano an-kilaila ka ny very sy manjavona eny an-dalana no betsaka. Hijoro hiady ho an’Antananarivo manoloana ny mety bizina sy tombotsoan’olom-bitsy toy ny nataon’ny PDS Ramanambitana Richard izay sahy nijoro nitaky ny hamerenana ny fitakiam-bola nataon’ny SMGD hiverina madiodio amin’ny CUA ve Rtoa Harilala Ramanantsoa sa hifitsaka ? Ho sahy hiady hatrany amin'ny Fitsarana ? Hikitika ireo tombotsoa sy bizin'olom-bitsy ho an'ny tombotsoan'ny CUA? Mbola mety ho olana hafa ihany koa ny famadihan’ny Fanjakana Foibe tao anatin’ny lalàna mifehy ny tetibolam-panjakana na LFI 2025 mamadika ny fitakiana hetran-trano sy hetran-tany izay nesorina tamin’ny kaominina ary hiantsorohan’ny Fanjakana Foibe. Marina fa misy ny fiaraha-miasa sy fiaraha-miombon’antoka samihafa, saingy mbola any an-kibon’ny omby ! Henjakenjana ny sedra miandry an-dRtoa Harilala Ramanantsoa na ara-politika na ara-pitantanana. Manomboka tonga sy miseho ny olana samihafa, toy ny olan’ny fako izay miha maro ny fivangongoana eto Antananarivo, miha mafana ny fifandirana amin’ny mpivarotra amoron-dàlana, manomboka midingin-drambo ny sokajina mpitatitra sasany toy ny taxi izay milaza fa tsy manaiky ny fitakiana volabe toy ny « fourrière » 200 000Ar isan’andro, ny politika mety ny ao anatiny ihany no hamely noho ny resaka tombotsoa avo lenta,…
ENCADRE
Tsara ny mampahatsiahy, fa ben’ny tanàna lany tamin’ny antokon’ny Fitondrana Atoa Naina Andriantsitohaina no nitantana an’Antananarivo nialohan’izao saingy tsy nahatafavoaka baolina ka asa hanao ahoana i Harilala Ramanantsoa eo anatrehan’ny olana sy sedra samihafa? Mbola hanala baraka tena ve ny Fitondrana ka hamela an’Antananarivo ho kamboty ao anaty korontana sy loto ety ambany ary teleferika eny ambony ?
Toky R