Politique

Antananarivo, Pr Sammy Grégoire Ravelonirina. Niezaka, hoy izy, ny ambaratonga sasantsasany nefa misy kosa ambaratongam-pahefana any ambonimbony any izay mahadidy mahatapaka ary manatanteraka ny fanomezana ny zon’ny mpampianatra mpikaroka. Raha miainga avy ao amin’ny minisitera ny taratasy, mety mandeha ihany fa rehefa tonga any ambadimbadika any dia taraiky. Ohatra fotsiny izao ny antotan-taratasy momba ny fiasana an-tselika na “vacation” sy ny ora fanampiny ho an’ny mpampianatra am-perinasa. Efa nandrasana sy nantenaina fa ho avy talohan’ny Krismasy. Efa tany Ambohitsirohitra, tao amin’ny fiadidiana ny repoblika ny antotan-taratasy momba izany. Mbola tsy vitan’ny filoham-pirenena sonia izany hatramin’izao ka iandrasana ny fahatsoram-pony sy fitsinjovany ny mpampianatra mpikaroka sy mpikaroka mpampianatra, indrindra, ireo mpiasa an-tselika ny hanasoniavany azy satria karama ho an’ireo mpampianatra an-tselika na “vacataire” efa hatrany amin’ny taona 2018-2019 no andrasana ny hisitrahany azy amin’ity volana janoary ity raha hisy. Mbola andrasana koa ny “indemnité de recherche et d’investigation” izay tambin-karama ho an’ireo mpampianatra mpikaroka retirety. Ho an’ny fakiolten’ny siantsa manokana dia ho an’ny taona 2018 hatramin’ny 2021 no efa nalefa any. Mbola tsy tonga aty amin’ny fiadidiana ny oniversiten’Antananarivo izany. Mbola misy koa ny vary mangatsiakan’ireo didim-pitondrana miisa 3 izay tsy hita be ihany hoe nankaiza na nankaiza. Vaovao ny taona ankehitriny ka dia fomba fiasa, fisainana, fandraisana andraikitra vaovao no andrasana amin’ny mpitondra fanjakana. Mba hanitsy ireo tandrevaka na heverina hoe fitavozavozana teo aloha fa mba ho taonan’ny asa tokoa ity taona 2023 ity, hoy hatrany ny tenany.
J. Mirija