Revolisionina

Tena ririnin-dasa tsy tsaroana tokoa ny fivoizana ny fahalalahana sy ny demokratsia tamin’ireny, kanefa izao iaraha-mahita izao, fa tena navadika ho fonjabe mitafo lanitra i Gasikara. Ny fanaovana politika miha mitotongana andro aman’alina dia io iaraha-mahita io fa milomano tanteraka ao anatin’ny Fanjakana tan-dalàna sy ny jadona amin’ny endriny samihafa isika. Iza tokoa re no tsy mikaikaika eo anatrehan’ny zava-manjo ny firenena sy ny vahoaka ankehitriny e ! Eny fa na ireo notambazana sô sy koveta tamin’ny fifidianana teo aza anie, ka mba iantraikany e ! Izany fahalalahana ara-toekarena izany moa dia toa nofinofy satria izay orinasa Malagasy mba misongadina sy mivoatra betsaka no trongisina amin’ny hetra midangana. Ny valalabemandry moa iaraha-mahita, fa tototra ao anaty fahasahiranana, difotry ny vidim-piainana, kiviana amin’ny endriny maro mba hahafahana milalao ny fahalemeny sy manao fitaovana azy. Asa tokoa re na izaho no tsy mahari-pery sy toa maniry manitra toy ny alika miambozon-koditra fotsiny eto, manantena Rameva hiditra amin’ny vody fanjaitra ! Tsy afaka ny hiraviravy tànana sy hanetsetra lava eto anefa, fa ny fanatanterahana ny nofy ririnina tena hisian’ny fanovana, dia ny fandraisan’andraikitra dieny izao na inona na inona mety ho endrika isehoany !
Tia Tanindrazana