Samy tsy nahita vahaolana izy mirahalahy

ny praiminisitra lehiben’ny governemanta ny fanendrena ireo minisitra handrafitra izany governemanta izany, hoy ny antoko politika Otrikafo. Ny antsika nefa ity, hoy ny filohan’izy ireo, Elia Rabevahiny, efa ho iray volana latsaka mbola tsy tafapetraka ihany. Misy antony maromaro mety mahatonga izany. Eo ny hoe ilay rivotra politika mitsoaka mihitsy no mety mahatonga ny fitondram-panjakana amin’izao fotoana izao sahirana manendry mpikamban’ny governemanta. Mandeha tsinona ny tsilian-tsofina amin’izao fotoana izao fa misy fifanatonana any ambadimbadika any ataon’ny fitondram-panjakana amin’ireo milaza azy ho mpanohitra sasantsasany. Somary mahavariana ihany izany resaka izany satria misy karazana fisokafana somary sadasada izany heverin’ny mpitondra fanjakana ho atao ary maha may ny mpanohitra sasantsasany. Mety ho antony iray mampitarazoka an’io izay fa ny faharoa koa dia ny hoe nisy ny faraparan’ny herinandro teo izany ny fihaonan’andriamatoa Andry Rajoelina sy Emmanuel Macron tany amin’ny lapan’i Elysée. Mbola omena anjara toerana ngezabe amin’ny fiainam-pirenena eto Madagasikara izany ny frantsay. Izay lafiny miisa 2 izay izany aloha no isan’ny maha tara ny fitsanganan’ny governemanta satria mandeha koa ny resaka fa manery ny hisian’ny fihaonambem-pirenena ny frantsay. Ho an’ny Otrikafo moa na ho tara io na hisy na tsy hisy dia efa 6 taona izay no naha praiminisitra lehiben’ny governemanta an’i Ntsay Christian. Tsy fotoam-piasana voalohany an’i Andry Rajoelina koa anefa ity fa efa fanohizana. Ny dikan’izay samy tsy nahita vahaolana izy mirahalahy. Mikatso ny raharaham-pirenena satria efa tonga amin’ny fetrany ilay mpitondra fanjakana. Izay izany no tsy maintsy hitadiavantsika hevitra ialan’ny firenena amin’izao fahantrany izao, hoy hatrany ny Otrikafo.
J. Mirija