Tafapetraka ny firotsahan-kofidian-dRavalo

no namaky lay ny fametrahana ny antontan-taratasy firotsahan-kofidiana eto amin’ny Kaominina Antananarivo Renivohitra omaly teny amin’ny OVEC Isotry. Betsaka ireo naneho fahavonona, saingy voafetra ny isany, raha ny nambaran’io Filohan’ny TIM io. Nomarihin’i Marc Ravalomanana fa tena sarotra ny filatsahan-kofidiana ka nametrahany fanontaniana hoe : tena fanahy iniana hasarotina ve ? Tena nohasarotina ankoatra ny anto-bola izay tena lafo dia lafo, raha ny nambarany. Navoitrany ny tsy fisian’ny demokrasia sy ny fametrahana ny fitoniana, fa izay milaza ny heviny dia tonga ny fanenjehana hatramin’ny fampidirana am-ponja. Nampahatsiahy ny nambarany ny 16 aogositra i Marc Ravalomanana fa nahazo tsodrano tamin’ireo mpiara-dia rehetra anatin’ny Firaisankina toy ny HVM, Pro-Siteny, Tsaratafina, RMDM,… na amin’ny anaran’ny TIM aza ny firotsahana. Ianareo no tompon’andraikitra voalohany, hamoray io, jereo ny sakantsakana mety hihatra amin’ny sasany, fa tena mijaly olona, hoy io Filoha teo aloha io. Mahatratra 14 moa ny antontan-taratasy ilaina. Ho azy manokana, nahitsy i Marc Ravalomanana nilaza fa tsy tokony ho sakana ny antontan-taratasy toy ny resaka hetra na 211Bis satria efa tamin’ny septambra tamin’ny 2023 izy no nahazo, ary ny tsy vita teo anelanelan’izay sy amin’izao sisa no nefaina, ka tsy tokony ho olana, ary efa filam-baniny, raha tonga amin’izany. Nomarihin’i Marc Ravalomanana fa raha misy ny korontana eo anatrehan’ny sakantsakana samihafa dia tsy avy amin’izy ireo. « Tsy avy aminay raha misy ny korontana, fa ny fanakantsakanana tsy amin’ny rariny,…», hoy i Marc Ravalomanana. Misy foana ny zavatra azo hanakianana, fa ny zavatra vita no ifampitsarana, ary mikaonty be ny « success story » na ny tantaran’ny fahombiazana, hoy i Marc Ravalomanana naneho ny fahatokisan-tenany ary namerina ny firesany matetika dia ilay hoe : tsy hamela irery ny vahoaka Malagasy, ary tsy hamela irery an’Antananarivo, ka nilazany fa hanarina ny Renivohitra. Ben’ny tanàna teto Antananarivo no nanombohan’i Marc Ravalomanana ny fanaovany politika rehefa voafidy tamin’ny anaran’ny Fikambanana Tiako Iarivo izy ny 14 novambra 1999, ary niakatra ho Filoham-pirenena 2 taona taorian’izay rehefa nirotsaka ho kandida Filoham-pirenena ny taona 2001. Voaongana teo amin’ny Fitondrana ny 2009 ka asa ho tafaverina amina fahefana sy toerana politika ve i Marc Ravalomanana 15 taona aty aoriana ? Izy no namaky lay fa andrasana ny hafa ! Hanao ahoana ny ho endri-pifidianana eto Antananarivo amin’ity ? Iza no kandidam-panjakana ? Hipoitra ve ny kandida tsy hampoizina afaka hamadika pejy hanarona ny lonilon’ny TIM sy ny TGV izay ady tsy vita tao anatin’ny 20 taona latsaka?
Toky R