Teti-dratsy ara-politika sy ara-pifidianana

mandrotsaka ny antontan-taratasy firotsahan-kofidiana, saingy miharihary ny tsy faharisian’ireo kandida. Herinandro sisa ananana satria hifarana amin’ny 19 septambra ny fandraisana ny dosien’ireo kandida handray anjara amin’ny fifidianana hatao ny 11 desambra. Miandry ora farany sa misedra olana ? Zara raha misy kandida satria mbola latsaky ny 10 ny kandida manerana ny Nosy voarain’ny CENI teny anivon’ireo OVEC, raha ny notaterin’ny fampahalalam-baovao iray omaly. Mahatratra 1695 anefa ny kaominina manerana ny Nosy. Anisan’ny antony ny fahasarotana samihafa satria mahatratra 14 ny dosie ilaina izay tena betsaka no maneho fa manahirana toy ny taratasin-ketra, ny « bulletin N3 », ny fanamarinana ny zom-pirenena,… ary manampy trotraka izany ny anto-bola izay nampitomboin’ny governemanta. Ny fahefana mpanatanteraka izay sady manana mpifaninana no manao ny fitsipi-dalao ka manao ny kajikajy rehetra hahakivy ny mpifaninana, izay « candidat farfelus » no nanasokajian’Atoa Andry Rajoelina izany tamin’ny fifidianana Filoham-pirenena. Na ny eo anivon’ny CENI aza vaky vava amin’io fahasarotana amin’ny fandrafetana ny antontan-taratasy io, nandefa fangatahana na « requête » any amin’ny Fanjakana mba hanamorana ireo dingana hahazoana ireo antontan-taratasy toy ny eny amin’ny sampan-draharahan’ny hetra sy ny trinonaly noho izany ny CENI, hoy hatrany io fampahalalam-baovao io. Iniana gafiana sy kiviana ve ireo mety ho kandida maro atahorana satria fifidianana tena manakaiky vahoaka ity kanefa tena miantraika any am-bilanin’ny vahoaka ny tsy fahombiazan’ny fitondrana? Na ny antokom-panjakana aza toa tsy rototra firy toy ny eto an-dRenivohitra izay tsy fantatra izay kandidany hatreto. Sa kiviana sy hasarotina ny an’ny mpifanandrina fa hamoraina ny an’ny kandidam-panjakana ka betsaka ny kaominina mety ho lisitra tokana ihany ? Ny fanasarotana dia efa kajy maloto, fa mora ihany koa ny fanintsanana lisitra mba hanomezana vahana izay tiana ho lany. Ny ho avy no hamaritra izay mety hitranga, fa raha ny feo hatrany anaty Fanjakana aza rehefa misy ny adihevitra momba ny fifidianana, dia misy mamoaka hoe : « raha hisy fifidianana», izay toa maneho fa tsy manam-piniavana hanao fifidianana ny Fanjakana ? Mampanahy ny zava-misy hoe : tena hisy ve ny fifidianana amin’ny 11 desambra 2024 sa mety hihemotra na halefa ihany fa lisitra tokana no betsaka na koa mety hisy sarintsarina kandida hatao mody mifaninana amin’izay tiana ho lany ?
MIHA MITOTONGANA NY FAHAFAHA-MIROTSAKA
Marina fa aleo vitsivitsy misy horaisina toy izay be tsy andraofana, saingy miharihary fa mitotongana ny fahafahana mirotsaka ho kandida amin’ny fifidianana eto Madagasikara, hasarotina hatrany mba hanomezana tombony ny kandidam-panjakana. Efa sary nitranga tamin’ny fifidianana depiote farany teo io satria raha hiverenana dia kandida 468 tamin’ny 519 no nambara fa nahafeno fepetra, ka nitotongana efa manakaiky ny antsasa-manila ny afaka nandray anjara raha oharina amin’ny tamin’ny 2019 izay nahatratra 803. Betsaka no nanana olana raha tsy hilaza afatsy ny ara-bola, ka ny antokon’ny fitondrana ihany no tena naharakotra an’i Madagasikara. Tena miteraka vokany tsara amin’ny Firenena ve anefa ny kajikajy maloto sy ny fiezahana hanao ampihimamba politika ? Arakaraka ny fihazakazahana manao be fandroaka ny seza sy fahefana ve ny vokatra ho an’ny mpitondra ankehitriny sa vao mainka milentika ny Firenena ?
Toky R
Sary fanehoana