Vondrona Firaisankina ao Sambava

raha ny fampitam-baovao voaray ny 9 aprily teo. Nanao fanambarana ny avy amin'ny OVEC na «Organe de Vérification et d'Enregistrement des Candidatures», izay sampana miandraikitra ny fandraisana ireo dosie firotsahana ho kandida, ao Sambava fa tsy ampy ny antotan-taratasy ho an'ny kandida avy amin'ny Firaisankina, Loïc Chan, ka nolavina avy hatrany izany fa tsy ho isan’ny ho kandida izy. Hatreto, ny kandida avy amin'ny Isika Rehetra miaraka amin'ny Andry Rajoelina na IRMAR ihany no manan-kery raha ao amin'ny distrikan’i Sambava. Manana 48 ora ny kandida hampiakarany ny fitarainana eo amin'ny CENI foibe. Raha ohatra ka mbola lavin'ny CENI hatrany dia mbola manana 48 ora hafa ihany koa ny kandida hampiakarany izany eo anivon'ny HCC na Fitsarana avo momba ny lalàmpanorenana, raha ny fanazavana hatrany. Ankoatran’ity tranga tao Sambava ity moa dia ny lafiny fikarakarana taratasy no saika nahenoana fitarainana maro raha ny mikasika ity filatsahan-kofidiana depiote ity. Eo koa ny endrika antsojay isan-karazany sahady tahaka ny fisamborana kandida iray tao Nosy be Hell ville ny faran’ny herinandro teo izay efa navoaka moa. Firy isan-jaton’ny filatsahan-kofidiana avy amin’ireo hery politika ivelan’ny fitondrana, indrindra, mpanohitra izany no ho ekena amin’ity fifidianana hoavy ity, raha toa ka misy kandida avy amin’ny vondrona politika manaraka ny lokon’ny fitondrana sahy milaza sahady fa hahazo ny 90% ao amin’ny antenimieram-pirenena? Ny raikipohy na «formule» nitranga tamin’ireny hetsiky ny kandida miisa 11 izay toy ny nosarihina nandany andro nidina an-dalambe ireny ve izany no hisarihina na hanamandrihana fanindroany indray ny mpanohitra ka hanome kianja malalaka handihizan’ny kandidam-panjakana fotsiny? Andrasana ny fivoaran’ny toe-draharaha.
J. Mirija