Fahantrana eto Madagasikara

taona 2024 iny rehefa tratry ny fitsaràm-bahoaka noho ny resaka halatra katsaka sy ny toy izany teny amina tanimbolin’olona iray. Rangahy efa lehibe, natao ho antsoina ho raiamandreny anaty fiarahamonina no tratra nanao halaboty, noho ny resaka tsy fisiana ao an-tokantrano sy fitadiavana hamelomana ny ankohonany, hoy ny fanazavàna tamin’izay fotoana izay. Mbola hita ho manjaka ny hala-boty, fifanararaotana, fifanambakàna eto amin’ny firenena amin’izao fotoana izao, izay heverina hoe taratry ny fahantrana eto Madagasikara, raha tsy haka ohatra hafa indray fotsiny izay vao nitranga ny faran’ny herinandro teo. Vehivavy tanora iray no voalaza fa tratra namaky trano tao Tanambao V, Toamasina. Mbola tsy nisy zavatra azo izy fa efa nahavoasokatra trano, hoy ny fanazavàna, ka tratra teo amin’ilay trano novakiany. Nanontaniana ny antony nangalarany izy ka nilaza fa tsy misy sakafo hoanina izy sy ny zanany ka izay no antony nahatonga azy nangalatra. Nalefa any amin’ny Polisy moa ilay renim-pianakaviana, raha ny tati-baovao voaray tany an-toerana tamin’iny fotoana iny. Tovolahy miisa 3 ao Mandritsara koa, tetsy ankilany, no voalaza fa nanana hetaheta mba hanana vatsy hiatrehana fianarana kanefa voatery naka mangahazon’olona am-potony avy tany Andilambola ary tra-tehaky ny mpanao andrimasom-pokonolona vao mangiran-dratsy, tamin’ny 2 ora maraina, ny zoma 21 martsa teo tao Maroamboka. Lelavola 400.000 Ariary no voasoratra ho tsy maintsy efain’izy ireo amin’ny dinabe ao Maroamboka raha 80.000 Ariary kosa no nalain’ny tompon’ny vokatra. Nandoa 240.000 Ariary ny vehivavy iray tsara sitrapo nisafidy tsy nitonona anarana mba hanavotana azy 3 mirahalahy ireo, noho izany ka avy hatrany dia norovitina ny taratasy fanekena fandoavana io vola voasoratra io raha vantany azo ny vola. Voarakitra tamin’ny fifanarahana ny fandoavana 80.000 Ariary isan’olona, nisitraka vary 10 kapoaka koa izy 3 lahy. Ankoatra izay dia efa misy vehivavy iray avy any Mandritsara mitady ravinahitra any Alemainina nanome fanampiana ho azy ireo dia vary fotsy gony iray ho ataon'izy ireo sakafo. Zatovolahy avy any Ankijanilava, Ambodidabo Maitsokely, izy ireto ka tsy afaka mody maka vatsy noho ny halaviran’ny toerana satria 2 andro vao tonga any raha avy ao Mandritsara, hoy ny fanamarihana. Kilasy faha 3 na «3 ème» sy famaranana na «Terminal» ireto tovolahy ireto ary nisaorana mitafotafo noho ny soa natao azy ireo, raha ny fampitam-baovao voaray hatrany. Isan’ny fanontaniana na fanamarihana mipetraka manoloanana tranga tahaka itony rehefa miseho eto amin’ny firenena ny hoe sy samy mpiara-monina ety ifotony ihany izany izao no lasa tia mifanararaotra sy mifanambaka, iza no nampianatra? Fa maninona no resaka hanohanana amin’izao fotoana izao no lasa voatery tsy maintsy hanosika mpianatra na renim-pianakaviana hangalatra na dia sakafo ho haniny anio ihany aza? Fa maninona no 400.000 Ariary be izao no dina ifanarahan’ny mpiara-monina na dia halatra mitentina 80.000 Ariary monja aza no antony? Tsy fifanararaotana sy fifanambakàn’ny samy mpiara-monina ihany ve no azo iantsoana izany? Avy any ambony ny ohatra, hoy ilay fitenenana.
J. Mirija