FAHAZOANA RANO FISOTRO MADIO

Anisan’ireny ny vahoakan’Alasora Avaradrano izay tsy nahazo rano indray mitete intsony efa ho roa volana izao indrindra fa ho an’ny Fokontany Alasora sy Miadana izay miorina eny ambony toerana. Ny tena mampalahelo anefa hoy ireo mponina dia lasa indray mandeha isan-kerinandro monja ihany koa sisa no tonga manatitra rano ho azy ny JIRAMA izay tsy mihoatra ny 10 m3 ka tsy mahavaha ny olan’ny mponina akory. Ny kaominina no mameno ny ambiny araka izany ka mampitatitra kamiao in’efatra isan-kerinandro izay miaty 50 m3 isanisany. Hatreto moa dia tsy mbola nisy vokany mihitsy ilay fanaovana tolo-bidy intelo miatoana mikasika izay orinasa handray an-tanana ny fananganana ilay siniben-drano ao an-tampon’Alasora. Mihoatra lavitra noho ny vola hatolotry ny fanjakana mantsy ny vola takian’izy ireo ka tsy mety manao izay mahafantatra izany. Voatery mampatsaka rano any amin’ny tanana ambany araka izany ireo mponina eny ambony toerana, antony mahatafakatra ny vidin’ny rano iray bidon miloko mavo hatrany amin’ny 2.000 Ar, raha 50 Ar kosa no hamarotan’ny kaominina azy.
Pati
Legende : Efa vidiana 2000 Ar ny rano iray bidon miloko mavo eny Alasora eny amin’izao !