FAMBOLENA AGRO-EKOLOJIKA

Mety aminy avokoa ireo karazam-bary sy legioma na hanin-kotrana volena hahafahana mamaha ny olan’ny tsy fanjarian-tsakafo any amin’ireo Faritra tena mila izany. Voakasik’izany manokana ny Faritra Anosy sy Androy izay hiasan’ny tetikasa AFAFI Sud. Tany mirefy 1000 ha hatreto no efa rakotr’izany ao Anosy, asa natao tato anatin’ny 3 taona. Tantsaha an’arivony no efa misitraka ny tombontsoa azo avy amin’izany ankehitriny, miparitaka amina tokantrano miisa 4.000. Toraka izany koa ny Faritra Androy raha araka ny vaovao azo. Vokatry ny fisian’io teknikam-pambolena vaovao sy manaraka ny toetr’andro io ka nanomezana fiofanana ireo tantsaha dia efa nosokafana any amin’ireo faritra roa ireo ihany koa ny ivon-toerana hahafahana mandray an-tanana ny Reny sy ny zaza…Fikambanam-behivavy miisa 8 no mitantana azy ankehitriny. Ankoatra ny fanomezana sakafo madio sy maro loko ary ara-pahasalamana ho an’ireo zaza 6 ka hatramin’ny 24 volana any an-toerana dia hampianarina ireo Renim-pianakaviana ireo koa ny resaka fahadiovana sy ny fikarakarana ireo karazam-bokatra misy any an-toerana mba ho lasa sakafo mahavelona sy mahasalama. Manodidina ny 1.800 isa eo ho eo ny zaza raisin’io ivon-toerana io ankehitriny, miampy vehivavy 2800 sy lehilahy 1900 isa.
Pati
Legende : Efa afaka mamokatra haricot vert tahaka izao ny any amin’ny Faritra Atsimon’ny Nosy !