Fanompana vahoaka

sy ireo mety mitovy saranga aminy no mari-drefy handrefesana ny fari-piainana sy ny fahantran’ny vahoaka. Nanaitra ny fomba firesaky ny Filohan’ny Antenimierandoholona Jeneraly misotro ronono Richard Ravalomanana tamin’ny fampahalalam-baovao vahiny iray volana lasa, saingy miverina mifoha ankehitriny sy lasa adihevitra goavana ankehitriny. Ity farany izay sahy nilaza tao anatin’ny ampahan’ny fandaharana fa tsy mahantra izany i Madagasikara, fa ny serasera no diso. « Raha mandeha any ivelany dia lazaina fa Madagasikara dia lazaina fa anjakan’ny tsy fandriampahalemana kanefa tena diso. Ampitahaina amin’ny firenen-kafa dia afaka mivoaka alina tsara eto Madagasikara. Lazaina fa Madagasikara dia Firenena faran’izay mahantra eto ambonin’ny tany, kanefa raha mandeha any Antananarivo na any amin’ireo tanàn-dehibe hafa dia misy fitohanana goavana ny fifamoivoizana toy ny aty, ka tsy afaka milaza isika fa mahantra kanefa misy fitohanan’ny fifamoivoizana amin’ny tanàn-dehibe. Raha makeny an-tsena, betsaka ireo olona miantsena amin’ny « Grandes surfaces » miaraka amin’ny, ka izany no ilazako fa tena manan-danja be ny serasera, ary lasibatra amin’izay lafiny izay i Madagasikara nanomboka fotoana tsy dia ela izay, hoy ny Filohan’ny Antenimierandoholona. Ny Antenimierandoholona dia mpiahy ny vondrom-bahoaka itsinjaram-pahefana, izany hoe : tokony hahalala ny tena zava-misy eny ifotony, ny zavatra iainan’ny Malagasy,… saingy mahagaga sy mampanongo tena raha ny Filohan’izany andrim-panjakana izany no sahy milaza fa tsy sahirana sy tsy mahantra izany i Madagasikara. Ny fitohanan’ny fifamoivoizana sy ny fisian’ny olona miantsena amin’ny tsena lehibe « Grandes surfaces » izany no lasa tondro sy mason-tsivana handrefesana ny tsy maha firenena mahantra ho an’ity olona ambony laharana faharoa eto amin’ny Firenena ity. Firy isan-jaton’ny Malagasy no manana fiara ? Firy isan-jaton’ny Malagasy no afaka miantsena eny amin’ny « Grandes surfaces » ? Tsy dia atao mahagaga anefa ny fahenoana mpitondra milaza hevitra taingina na « argument bidon » satria hatramin’ny Filoham-pirenena aza milaza fa tsy ekeny ny hoe : ambanin’ny 600 dolara ny harin-karena na PIB isam-batan’olona eto amintsika ary mbola mandroso noho i Somalie sy Soudan ary Mali isika. Fandrosoana inona no hita amin’ny mpitondra mpanamarin-tena eo anatrehan’ny tsy fahaiza-mitantana ?
Toky R