Madagasikara

amin’ny ady amin’ny fanondranan’olona avy eto Madagasikara ny ACM (Aviation Civile de Madagascar) sy ny Birao Nasionaly miady amin'ny Fivarotan'olona na ny BNLTEH (Bureau National de lutte contre la Traite des Etres Humains) ny andron’ny omaly. Ny tanjona dia ny hampahafantarana sy hanabeazana ny mpiasan'ny seranam-piaramanidina sy ny mpandeha momba ny halehibeny, ny fisehony ary ny loza aterak’io zava-doza ho an’izao tontolo izao io, mba hahafahan'ny tsirairay mahatakatra ny famantarana mialoha sy ho mailo, hoy ny tatitra. Ny fiaraha-miasa eo amin'ny ACM sy ny BNLTEH dia mikendry ihany koa ny hanamafy ny fahaizan'ny mpisehatra samihafa hahita, hisoroka ary hiady amin'ny fivarotan'olona amin'ny fomba mahomby. Ao anatin'izany, hisy hetsika voakasika hotanterahina eny amin'ny seranam-piaramanidina, raha ny fanamarihana. Raha ny fikarohana tsotsotra natao, misy endrika maromaro ny fivarotan'olona mivantana na ankolaka avy eto Madagasikara. Anisan'izany ny fandefasana azy ireo any ivelany hohararaotina ara-nofo, ny asa an-terivozona ary ny fanondranana ankizy. Mora iharan'ny fanararaotana ara-nofo ny vehivavy sy ny ankizy malagasy, na eto an-toerana na any ivelany. Matetika ny tambajotran'ny mpivarotra olona dia maka ny olona ampiasainy amin'ny fampanantenana asa ara-dalàna, saingy avy eo anararaotany amin'ny toe-javatra tsy manaja ny maha-olona. Mety ho terena hiasa amin'ny toe-javatra tena mafy sy sarotra, fa tsy araka ny nampanantenaina. Matetika ny ankizy no iharan'ny fanondranana ho an'ny fananganan-jaza tsy ara-dalàna na fanambadiana an-terivozona. Madagasikara ihany koa dia voasokajy ho loharano, toerana fiampitana ary toerana alehan'ny olona iharan'ny fivarotan'olona iraisam-pirenena. Indraindray alefa any amin'ny firenena any Moyen-Orient, Azia ary Afrika ny olona Malagasy, izay iharan'ny asa an-terivozona na fanararaotana ara-nofo amin'ny toe-javatra tsy manaja ny maha-olona.
Toky R