Federasionin’ny ady totohondry

Miha miditra hatrany amin’ny lenta avoavo kokoa eo amin’ny fenitra iraisampirenena amin’izao fotoana izao ny taranja ady totohondry, hoy ny filohan’ny federasionina malagasin’ity taranja ity, Hery Mamy Rabarisoa. Izay no antony hikarakaranay fiofanana miaraka amin’ireo mpanazatra eto Analamanga aloha, hoy izy. Tsy manakana ny any amin’ny faritra hiakatra eto sy handray anjara nefa izany. Eo ilay tekinisianina kameroney, Cyprien Tabo, izay hitarika io fiofanana ho an’ny mpanazatra io. Tsy maintsy atao izay hahatonga amin’ny farany ambony ny haavo tekinika sy ny fikarakaràna ary ny fitantanana ny ady totohondry. Iaraha-mahalala tsinona fa eto amintsika izao dia lasa misy olona tsy fantam-pantam-pihaviana izany, sady tsy ao anaty federasionina, tsy ao anatin’ny ligy, tsy ao anaty seksionina na klioba fa dia mikarakara fifaninanana ady totohondry fotsiny izao. Handray fepetra hentitra manomboka eto ny federasionina mikasika ireny mpikarakara fifaninanana an’elakelantrano ireny na ireny klioba sy mpanazatra na ligy mandray anjara amin’ireny fifaninanana tsy ara-dalàna ireny. Ny atao hoe tsy ara-dalàna dia tsy misy fahazoan-dalana avy amin’ny federasionina. Hampanao fifaninanana ligy maromaro avy any amin’ny faritra ianao dia tsy haka alalana. Matoa miantso hatrany amin’ny faritra izany dia efa fifaninanam-pirenena. Tokony ho andraikitry ny federasionina ny miahy izany. Handray fepetra hentitra izay ho ampahafantarinay ny sehatra iraisampirenena izahay sao any aoriana any misy fisehoan-javatra hoe hisy hikarakara ady totohondry na tahaka izany dia efa avy any amin’ny federasionina iraisampirenena mihitsy ny sazy ho an’ireny hetsika an’elakelantrano ireny ka mampitandrina farany ny federasionina malagasy eto amin’ireny mpikarakara fifaninanana an’elakelan-trano ireny. Na ao amin’ny Gymnase Mahamasina sy lapan’ny fanatanjahantena aza no hanaovanao an’io dia an’elakelantrano foana no hanasokajiana azy rehefa tsy nahazo alalana. Ny mpitsara mandray anjara amin’ireny dia ho esorina avy hatrany tsy ho ao anatin’ny FMB na Federasionina malagasin’ny ady totohondry. Toy izany koa ny mpanazatra. Hitory azy ireny any amin’ny fitsaràna famaizana na «cours pénal» mihitsy izahay satria manao fisandohana asa na «isurpation de fonction» izy izany. Misy federasionina eto, minisitera, komity olaimpika ka nahoana no ianao no hisandoka ho mpitantana ny ady totohondry? Tsy azo ekena izany. Tsy maintsy ampiharina amin’izay ny lalàna, hoy hatrany ny federasionin’ny ady totohondry.
J. Mirija