Sport

I Hery Betafo sy Zigle ary Bruno no nandresy an'i Baloti, Havana ary Tiana Kely. Tena tsara ny vokatra raha 97 olon-telo miaraka ireo nandray anjara. Asa anefa izay nahazo ny Federasiona fa toa mihevitra ny efa tafavoaka sahady izy. Nanao fanambarana mantsy ny FSBM taorian'ny fifaninanana tany Yzeure io hoe tafiditra amin'ny fanomanana ny fiadiana izay ho tompondaka eran-tany any Dijon ny volana desambra izao zavatra atao izao. Nirongatra noho izany ireo mpitia sy mikirakira ilay taranja niteny hoe tsy araky ny fifanarahana tany amboalohany anie izany izay namaritra hoe ireo telo tompondakan'i Madagasikara no mandeha miampy mpitifitra tsara iray. Ny tian'ny FSBM ahatongavana angamba dia mety ireo tanora ireo.Tsy izay anefa ny zava-misy amin'izao raha hijery ny vokatra tany Marseille isika fa antitra mampiady kalo ka ny antitra antitra ihany.Zokiolona telo tokoa no nibata ny fandresena tamin'ny La Marseillaise izay nisy ekioa 2120 izany hoe tsy azo lazaina ho kisendrasendra. Mbola nisy an'i Jouffre izay "patron" aza no niaraka tamin'ny Philippe roalahy dia Quintais sy Suchaud.Toa mampatsiahy sahady ny naha tompondaka eran-tany ny Malagasy tatsy La Reunion nisy an'i Kailas Oukabay izay "patron" niaraka tamin'i Jean Robot Randrianandrasana ary Racl Christian Andriatseheno. Ity farany izay efa sokajina ho zokiolona koa aza dia mbola tafita tany amin'ny manasa-dalan'ny La Marseillaise. Mbola mampametra-panotaniana koa izany ny mikasika ireo mpilalao any ivelany. Tamin'ny herinandro teo fotsiny dia efa nandresy tany anaty fifaninana i Lahatra Randriamanantany ary toy izany koa i Jex Angelo izay samy any Frantsa. Fa tsy misy vokana mandingana koa ka tsy ahazoan'i Taratra Rakotoninosy any Canada. Samy mafy ireo ka tokony jerena izay tena mendrika ho ekipam-pirenena. Ampolon-taonany maro mantsy izay ny Frantsay no nandrombaka ny anaram-boninahitra ary tsy niova fa Lacroix, Suchaud ary Quintais foana fa taty aorina vao nisy an'i Dylan Rocher. Ary dia nety ny azy satria ny tsipy kanetibe dia lalao iraisana ka olona tena mifankahazo sy mitovy hevitra no tafavoaka mandresy.
Clément RABARY